‘एनवास’ सफ्टवेयरको अभ्यास थालियो

Posted on: January 19, 2020 | views: 286

विदुर । खानेपानी मन्त्रालयले देशैभरिका खानेपानी आयोजनाको अवस्था, आयोजनाको सुचारुपना, दिगोपना र पहुँच बाहिर रहेका उपभोक्ताबारे डिजिटल तथ्याङ्क, जानकारी र सूचना दिने उद्देश्यले वेबमा आधारित सफ्टवेयर तयार गरेको छ ।

विश्व बैंकको सहयोगमा तयार गरिएको सफ्टवेयर खानेपानी मन्त्रालयमा प्रयोगमा ल्याउन अभ्यास थालिएको छ । ‘एनवास’ नाम दिइएको सफ्टवेयर प्रणालीमार्फत देशैभरका खानेपानी आयोजनाको डिजिटल तथ्याङ्क, सर्भे गर्ने व्यक्ति, सम्बन्धित खानेपानी योजनाको मुहान, रिजर्भवायर ट्याङ्की र पाइपलाइनको अवस्था साथै उपभोक्ता समितिबारे विस्तृत जानकारी पाउन सकिने मन्त्रालयका सिनियर डिभिजनल इन्जिनीयर डाक्टर रञ्जित ओझाले जानकारी दिनुभएको छ । 

यस्तै, खानेपानी सुविधा नपुगेको तथा पहुँच बाहिरका उपभोक्तासम्बन्धी जानकारी पनि सफ्टवेयरमा समावेश गरिएको छ । सफ्टवेयरको माध्यमबाट खानेपानीमा पहुँच नभएका जनसङ्याको तथ्याङ्क आएपछि खानेपानीको पहुँच नभएका क्षेत्रको पहिचान हुने भएको छ जसका कारण आगामी दिनमा योजना छनोट गर्न सजिलो हुने बताईएको छ ।

खानेपानीको अवस्थाको तथ्याङ्क लिइसकेपछि देशभरका ७५३ वटै स्थानीय तहमा सरसफाइ योजना बनाउने तयारी गरिएको सरकारले जनाएको छ ।