स्वास्थ्य चौकीको नयाँ भवन समुदायलाई हस्तान्तरण(फोटो फिचर)

Posted on: July 30, 2018 | views: 620

१४साउन, समुन्द्रटार । शहरी बिकास तथा भौतिक निर्माण विभाग डिभिजन कार्यालय नुवाकोट मार्फत निर्माण गरिएको दुप्चेश्वर गाँउपालिका वडा नं. ६ स्थित ‘समुन्द्रटार स्वास्थ चौकी तथा प्रसुती केन्द्र’को भवन समुदायलाई हस्तान्तरण गरिएको छ ।
२०७१ सालदेखि निर्माण सुरु गरिएको भवनको विनासकारी भूकम्पले पु¥याएको असर तथा त्यसपछिको असहज बनेको परिस्थिती पश्चात निर्माणको जिम्मेवारी पाएको ठेकेदार कम्पनीले तोकिएको मापदण्ड अनुसार निर्माण गरेको भूकम्प तथा बहुविपद प्रतिरोधी भवन सोमबार गाँउपालिका अध्यक्ष योबिन्द्रसिंह तामाङले स्वास्थ्य चौकी व्यवस्थापन समितिका अध्यक्ष समेत रहनुभएका वडा नं ६ का वडाध्यक्ष किशोर आचार्यलाई हस्तान्तरण गर्नुभएको हो । नयाँ भवन हस्तान्तरण गर्दै गाँउपालिका अध्यक्ष तामाङले गाँउपालिकाबासीको लागी पायक पर्ने स्वास्थ्य सँस्था समुन्द्रटार भएकाले निकट भविष्यमा डाक्टर सहितको अस्पताल र त्यही अनुसारको सेवा प्रदान गर्ने व्यवस्था मिलाउने प्रतिबद्धता जनाउनुभएको छ । उहाँले अहिले बर्थिङ सेन्टर सहितको सुविधालाई सुचारु गराई त्यसको लागी आवश्यक पर्ने नेपाल सरकारले तोकेको निःशुल्क औषधि उपलब्ध गराएर गुणस्तरीय सेवा प्रवाह गर्न निर्देशन दिनुभएको छ ।
भवन हस्तान्तरण कार्यक्रममा गाँउपालिका उपाध्यक्ष अञ्जु आचार्यले सुविधासम्पन्न भवन सहितको स्वास्थ्य सँस्था सञ्चालनले मातृशिशु, नवजात शिशु, गभर्वती तथा सुत्केरी महिलाको लागी प्रत्यक्ष लाभ पुग्ने र त्यसले समुदायको स्वास्थ्य अबस्थामा उल्लेख्य सुधार ल्याउने विश्वास व्यक्त गर्नुभएको छ ।
‘सिद्धार्थ, धजञ्जय र मदरल्याण्ड’ जेभी मार्फत करिब दुई करोड रुपैयाँको लगानीमा निर्माण भएको स्वास्थ्य चौकीको नयाँ भवन आगामी आइतबारदेखि सञ्चालनमा ल्याउने व्यबस्थापन समितिका अध्यक्ष एवम् वडाध्यक्ष आचार्यले बताउनुभएको छ । भूकम्पले पु¥याएको जोखिमको भवनमा सञ्चालनमा रहेको स्वास्थ्य सेवालाई नयाँ भवनमा हस्थान्तरण गरी सरकारले तोकेको निःशुल्क स्वास्थ सेवालाई प्रभावकारी रुपमा उपलब्ध गराएर आगामी दिनमा अस्पतालको रुपमा विकास गर्ने गाँउपालिकाको लक्ष्य पूरा गर्न सहयोगको प्रतिबद्धता जनाउनुभएको छ ।
भवन निर्माणको लागी निःशुल्क रुपमा तीन रोपनी जग्गा उपलब्ध गराउनुभएका जग्गादाता होमबहादुर डंगोल र दुई रोपनी जग्गा उपलब्ध गराउनुभएका जग्गादाता मधुुसुदन आचार्यलाई सम्मान गरिएको स्वास्थ्य चौकी व्यवस्थापन समितिका सदस्य शशी आचार्यले जानकारी दिनुभएको छ ।
नयाँ भवन निर्माण भएसँगै बिरामी जाँच, गर्भवती तथा बर्थिङ सेवा, निःशुल्क औषधिको उपलब्धता, बिरामीको एकीकृत, तथ्याङ्क लगायतमा सहजता पुगेकाले आगामी दिनमा स्वास्थ्य प्रयोगशाला सेवा उपलब्ध गराउने तयारी रहेको स्वास्थ्य चौकीका इञ्चार्ज ताराकुमार श्रेष्ठले बताउनुभएको छ ।
कार्यक्रममा गाँउपालिकाको प्रमुख प्रशासकीय अधिकृत कृष्णहरी पौडेल, स्वास्थ्य शाखा प्रमुख बिहारीशरण कुइकेल सहित विभिन्न शाखाका प्रमुख, वडाध्यक्षहरु तथा वडा सदस्य एवम् कार्यपालिका सदस्यहरु, स्थानीयतहमा रहेका बैंक तथा बित्तिय सँस्थाका प्रतिनिधि लगायतको सहभागिता रहेको थियो ।