ज्योती गुमाएका ८४ जनाको पुनः फर्काउन सफल

Posted on: May 18, 2018 | views: 178

विदुर, नुवाकोट । मोतियाबिन्दु भएर आँखाको ज्योती गुमाएका याहाँका ८४ जनाको पुनः ज्योती फर्काइएको छ ।


मोतियाबिन्दु लागेका बिरामीको लागी जिल्ला सामुदायिक आँखा केन्द्र नुवाकोटको आयोजनामा शुक्रबार सम्पन्न दुईदिने निःशुल्क शिविरमा उनीहरुको गुमेको ज्योती फर्काइएको हो ।


दृष्टि गुमाएकाहरुको तथ्याङ्क संकलन गरी प्रदान गरेको सेवा मार्फत उनीहरुले अब स्पष्टसंग आँखा देख्नसक्ने भएको सामुदायिक आँखा केन्द्र नुवाकोटका प्रमुख शंकर अधिकारीले जानकारी दिनुभयो ।


तिलगंगा अाँखा प्रतिष्ठान काठमाडौं र नेपाल रेडक्रस सोसाइटी जिल्ला शाखासंगको सहकार्यमा विशेषज्ञ चिकित्सक मार्फत केन्द्रको कार्यालय विदुरमा शल्यक्रिया गरी ज्योती फर्काउन सफल भएकाले उनीहरुले आगामी दिनमा सरसफाईमा ख्याल गर्दै समय–समयमा जाँच गराएमा नियमित रुपमा दृष्टि पाउने अधिकारीले बताउनुभयो ।


जिल्लाको विभिन्न स्थानमा गरिएको निःशुल्क आखा शिविर र केन्द्रमा जाँच गर्न आएका बिरामीको तथ्याङ्क संकलन गरी आयोजना गरिएको निःशुल्क शल्यक्रियामा सम्पर्कमा आएका सबैलाई दुई दिनमा समेटिएको केन्द्रले जनाएको छ ।