४ बुँदे जनहितको माग राख्दै १२ औं पटकको अनसन २० गतेबाट गर्ने डा केसीको घोषणा

Posted on: September 19, 2017 | views: 412

काठमाडौं ।

११ औं पटकसम्म जीवन जोखिममा पारेर आमरण अनसन बसेपनि सम्झौता गर्ने तर काम नगर्ने सरकारको झुठोसम्झौताका कारण प्रा. डा. गोविन्द केसीले असोज २० बाट फेरी आमरण अनसन बस्ने घोषणा गरेका छन् ।


डा. केसीले यसपटक नेपाल आयल निगममा अर्बौं रुपैयाँ घोटाला गरेको आरोप लागेका पदच्यत गरिएका महाप्रवन्धक गोपाल खड्कामाथि कारवाहीको माग सहित चारबुँदे माग राख्दै अनसन घोषणा गरेका हुन् ।


डा. केसीले आफूहरुको सुझावअनुसार चिकित्सा शिक्षा विधेयक तत्काल पास गर्नु पर्ने माग राखेका छन् ।


एमबीबीएस अध्ययनका लागि काठमाडौं विश्वविद्यालयले तोकेको शुल्क खारेज गरी उपत्यकाभित्र ३८ लाख ५० हजार र बाहिर ४२ लाख ४५ हजार कायम गर्नु पर्ने र केयूका विवादास्पद डीन राजेन्द्र कोजुलाई बर्खास्त गर्नुपर्ने माग राखिएको छ ।


बर्खास्त गरिएका आयल निगमका तत्कालीन प्रमुख गोपाल खड्कामाथि छानविन गर्नु पर्ने, कर्णाली स्वास्थ्य विज्ञान प्रतिष्ठानमा अध्ययन अध्यापन सुरु गर्ने गरी बजेटको व्यवस्था मिलाउन र डोटी-डडेल्धुरा, धनुषा-महोत्तरी, उदयपुर, पाँचथर-तेह्रथुममा सरकारी मेडिकल कलेज खोल्ने प्रक्रिया अघि बढाउनु पर्ने माग सामाजिक अभियन्ता केसीले राखेका छन् ।