डा. केसीको चेतावनीपछि विवादास्पद नेशनल मेडिकल कलेजको सम्वन्धन त्रिविद्वारा खारेज

Posted on: September 06, 2017 | views: 407

काठमाडौं ।

भदौ २१ गतेसम्ममा त्रिभूवन विश्वविद्यालयले विवादास्पद काठमाण्डौ नेशनल मेडिकल कलेजको सम्बन्धन खारेज नगरे आमरण अनसन थाल्ने सामाजिक अभियन्ता डा. गोविन्द केसीको चेतावनी पछि त्रिविले आफ्नो निर्णय सच्याएको छ ।


पूर्वाधार, भवन, अस्पताल लगायत सबै किसिमबाट अयोग्य हुँदाहुँदै सम्बन्धन दिइएको नेशनल मेडिकल कलेजको सम्वन्धन चौतर्फी बिरोध र संसदीय अनुसन्धानमा परेपछि त्रिविले आज निर्णय फिर्ता लिएको हो ।


आफ्नो निर्णयमा बिरोध हुन थालेपछि त्रिविले यसअघि सम्बन्धन स्थगन गर्ने निर्णय मात्र गरेको थियो । काठमाण्डौ नेशनलको राजधानीको घट्टेकुलोमा रहेको भवनमा अस्पताल सञ्चालन गर्ने समेत अनुमति नलिएको र उक्त भवन र पूर्वाधारहरु अस्पताल सञ्चालन गर्न योग्य नभएको भनी स्वास्थ्य मन्त्रालयद्वारा गठित समितिले प्रतिवेदन समेत दिएको थियो ।


तर त्रिविका विवादास्पद उपकुलपति तीर्थ खनियाँकै अग्रसरतामा अनुमति दिइएको थियो । चिकित्सा शिक्षा सुधारका लागि भन्दै विभिन्न मागसहित प्राडा गोविन्द केसी एघारौं चरणको अनशनमै रहेका बेला त्रिभूवन विश्वविद्यालयले सर्वोच्चको आदेश अनुसार भन्दै चोरबाटोबाट काठमाण्डौ नेशनललाई सम्बन्धन दिएको थियो ।


त्यसपछि उत्पन्न दवावले स्थगन भएको सम्बन्धन आज खारेज भएको हो । डा. केसीले उक्त सम्बन्धन खारेजीका साथै चिकित्सा शिक्षा ऐन नआउँदासम्म कुनै मेडिकल कलेजलाई सम्बन्धन दिन नहुने अडान सहित आजसम्मको अल्टिमेटम दिएका थिए ।