गमला मन्त्री र एकादेश नेपालको धान रोपाई (फोटो फिचर)

Posted on: June 29, 2016 | views: 936

एकादेशमा एउटा कोठा थियो ।त्यो सभाहल जत्रो कोठा बातानुकुलित एसी जडित थियो ।

कोठामा एक दिन बिशेष समारोह आयोजना गरियो । सोफा,कुर्चि र टेवुल सजाइयो । टेवुलमा फुल र फुलका बुकीहरु राखिए । एकैछिनमा गन्नेमान्ने मान्छेहरु आए । कोठा चिरिच्याट्ट पारि भुइमा रातो कार्पेट विच्छ्याइएको थियो । रातो कार्पेट माथि अर्को फुलबुट्टे गलैचा थियो ।

गलैचामाथि रातै रंगको गमला राखियो । गन्नेमान्नेहरु उठे, गमलाको छेउमा गए । वरिपरि जी हजुरीमा खटिनेहरु सर्याकसुरुक गर्न थाले ।

त्यसैबेला एकजनाले करुवाबाट गमलामा पानी खन्याए । एउटी भद्र महिलाजनले रातै रंगको प्लाष्टिकको स्ट्रेमा धानको वीउ ल्याइन र बरिष्ठ मध्येका एकजनाको हातमा दिइन ।

उनले बीउ हातमा समाए अनि छुपुछुपु गमलामा रोपे । वरिपरि रहेका गन्नेमान्ने र जीहजुरीमा खटिएकाहरुले उद्धेश्य पुरा भएको भन्दै ताली बजाए ।

पछि थाहा भयो त्यो दिन २०७३ असार पन्ध्र रहेछ, गन्नेमान्ने मध्ये बीउ रोप्ने चाँही देशको कृषिको उन्नती गर्न लागिपरेका मन्त्री रहेछन ।

धानको उत्पादन बढाउन गमलामा धान रोपेर उनले कृषिक्रान्ति गरेका रहेछन । क्रान्तिपछि उनी गाडीमा झण्डा हल्लाउँदै, साइरन बजाउँदै कतै हुइँकिए ।

तर धान रोप्न खेतमा पुगेका किसान भने आकाशबाट पानी नपरेर, खेतमा राख्ने मल नपाएर टाउँको समाउदै घरतिर फर्केछन । त्यो एकादेश नेपाल रहेछ ।


पत्रकार रामकृष्ण भण्डारीले फेसबुकमा लेख्नुभएको स्टाटस र तस्विर साभार गरिएको हो ।