हरिबंश आचार्यको ६१ वर्षे यात्रा यस्तो रह्यो

Posted on: November 13, 2018 | views: 3964

काठमाडौ ।
लोकप्रिय कलाकार हरिवंश आचार्य आज देखि ६१ वर्षमा प्रवेश गरेका छन् । गफगाफ डटकमको अनुसार विक्रम सम्वत २०१४ साल कार्तिक २७ गते काठमाण्डौको गौरीधारामा जन्मिएका हरिवंश, हरिवंशपूजा पछि  जन्मेका परिवारका एक मात्र छोरा हुन् । पाँचजना छोरी मात्र जन्मेपछि छोरीले पिण्ड दिन नहुने र छोरा नै चाहिने भन्दै छोराको चाहमा हरिवंशका आमा बुवाले हरिवंश पूजाल गाएका थिए । हरिवंश पूजा लगाएर जन्मेका कारण उनको नाम पनि हरिवंश रहन गएको हो । आमा बुवाका रुढीबादी सोंचका कारण आफू जन्मिन पाएको हरिवंश बताउँछन् ।  

बुवा ७३ वर्षको हुँदा हरिवंशको जन्म भएको थियो । तर उनी जन्मेको ६ वर्षपछि उनका बुवाको निधन भयो । उनकी आमाको पनि उनी ११ वर्षको हुँदा निधन भयो । सानै उमेरमा आमा बुवा गुमाउँदाको पीडा र दुख कस्तो हुँदो रहेछ ? भन्ने कुरा कसैले उनी सँग सोध्दा सायद राम्रो जवाफ पाउँछ ।  आमा बुवा नहुँदा जीवनमा जेठी दिदी बिन्दु आचार्यले अभिभावकको जिम्मेवारी पूरा गरेको हरि बताउँछन् । उनी बिन्दु दिदीलाई आमाको दर्जामा राख्छन ।   १७ वर्षको उमेर देखि कलाकारिताको शुरुवता गरेका हरिवंशले  रेडियो नेपालका हरिप्रसाद रिमाल र जितेन्द्र महत अभिलासी सँगको सहयोगले २०३१ सालमा कलाकारिताको शुरुवात गर्ने मौका पाए । त्यसपछि उनी राष्ट्रिय नाचघरमा पुगे । विक्रम समवत २०३२ सालमा गाईजात्रा महोत्सवमा सहभागी हुने सौभाग्य उनलाई मिल्यो ।  यो गाईजात्रामा काम गरेपछि उनको चर्चा परिचर्चा शुरु भयो ।

निरन्तर ६ वर्ष कलाकारितामा संघर्ष गरेपछि उनको मदनकृष्ण श्रेष्ठसँग भेट भयो । मदन कृष्णसँग भेट भएपछि उनले उनी सँगको सहकार्यमा स्टेज नाटक देखि टेलि सिरियल बनाउने काम गरे । मदन कृष्णसँग हरिवंशको यात्रा चार दशक पार गरिसकेको छ । उनी मदन कृष्णलाई जीवन साथी भन्न नमिल्ने भन्दै जीवनदाई भन्न रुचाउँछन् । मदन कृष्णसँग मिलेर उनले लालपूर्जा, हरिबहादुर मदनबहादुर, १५ गते लगायतका सिरियलहरु बनाए जुन अत्यधिक रुचाईएका सिरियलहरु हुन् ।  पर्दामा बुढी आमाको भूमिका होस् या तन्नेरी युवाको उनले हरेक चरित्रलाई न्याय दिएका छन् । उनको अभिनयबाट जो कोही पनि सहजै प्रभावित हुन्छ । पर्दामा अभिनय गरेर अरुलाई सहजै हँसाउने उनी स्वयमले भने जीवनमा हाँसो भन्दा धेरै आँशु पिएका छन् ।  

बाल्यकालमै आमा बुवा गुमाएका उनले ५३ वर्षको उमेरमा फेरि एकपटक जीवनको महत्वपूर्ण व्यक्तिलाई गुमाए । श्रीमती मिरा उनको जीवनबाट सदाका लागि टाढा भईन् ।  अरुलाई हँसाउन संघर्ष गरिरहने हरिले आफ्नो जीवनमा भने आँशु धेरै पाए । हाँस्य कलाकार भएर पनि उनी अरुलाई हँसाउन सहज र आफू हाँस्न गाह्रो भएको बताउँछन् ।

दोस्रो विवाह :
२६ वर्षको उमेरमा हरिवंश वैवाहिक बन्धनमा बाँधिए । व्रिकम सम्वत २०४० मा मीरा सँग विवाह गरेका हरिवंश दुई सन्तान त्रिलोक र मोहितका पिता पनि बने ।  तर मीरासँग हरिवंशले आधा जिन्दगी मात्रै काटे । २० वर्षसम्म मुटुमा पेश मेकर राखेर बाँचेकी मिरा मस्तिष्क पक्षघातका कारण संसारबाट बिदा भईन् । मिराको निधन पछि हरिवंश आचार्य पूर्ण रुपमा टुटे । उनी केही समय डिप्रेशनमा पनि गएका थिए । मिराको निधन पछि नै हरिवंशले जीवनमा आएका आरोह अवरोहरुलाई समेटेर किताब लेख्ने मन बनाएका थिए । मीराले साथ छोडेपछि उनको एक्लो पनलाई बिर्साउन आईन् बुटवलकी रमिला पाठक ।  आफूभन्दा १३ वर्ष कान्छी रमीलासँग उनले मिराको निधन भएको ठिक एक वर्ष पछि विवाह गरे । रमिलाले पनि पति बियोग सहेकी थिईन् । मिराको निधनसँगै एक्लिएका हरिबंश रमिलाको आगमनले दोस्रो जन्म पाएको बताउँछन् ।   अहिले हरि र मिरा प्राय एकसाथ हुन्छन् ।

कुकुर र हरिवंशको सम्बन्ध :
हरिवंशले आफ्नो अटो बायोग्राफी‘चिना हराएको मान्छे’मा जीवनका सबै सुख र दुखहरुलाई स्थान दिएका छन् । यस बाहेक पनिउनले प्रस्तुत गरेका केही प्रसंगहरु निकै चाखलाग्दा छन् । तर उनको कुकुरसँगको सम्बन्धको प्रसंग भने चाखलाग्दो मात्रै हैन अचम्मको छ । उनले आफ्नो जीवनलाई कुकुरको जीवन सँग तुलना गरेका छन् । कार्तिकमा जन्मेका उनलाई सानोमा केही बदमासी गर्दा अरुले कात्तिके भनेर बोलाउँथे । किनभने कार्तिक महिनालाई कुकुरको सिजनको रुपमा लिईन्छ । कार्तिकमै जन्मेका उनले कुकुरसँग तुलना गर्दै आफूले जीवनमा कुकुरले जस्तो दुख र सुख दुबै पाएको बताउँछन् । रंग मन्चमा काम गरेर उनले जीवनमा पहिलो पटक पाएको प्रमाण पत्र पनि कुकुर सँगै सम्बन्धित थियो । उनले पहिलो पटक कुकुरकै भुकाईबाट प्रशंसा पत्र पाएका थिए ।

जसरी बाटोमा बसेको कुकुरलाई केहीले  खाने कुरा  दिन्छन् केहीले लखेट्छन् त्यसरी नै उनले पनि जीवन भोगाईको अनुभव संगालेका छन् । केही भुस्याहा कुकुरहरु हुन्छन् त केही महंगा कुकुरहरु । भुस्याहा कुकुरहरुले दुख पाउँछन् भने  महंगा कुकुरहरुले एयर कंडिसनिङ गाडीमा बस्न पाउँछन् । मालिक मालिक्नीको काखमा बसेर खेल्ने अनि महंगा खानेकुराहरु खाने गर्छन् । आफ्नो जिन्दगी पनि यस्तै दुई थरि कुकुरको जस्तै भएको उनको भनाई छ । जीवनमा कुकुरले पाउने दुख पनि पाएको र सुख पनि पाएका कारण उनले आफूलाई कुकुरसँग तुलना गरेका हुन् ।  कुकुर हरिवंशलाई एकदमै मन पर्ने जनावरमा पर्छ । संयोगबस उनी कुकुरसँगै सम्बन्धित संस्थाको अध्यक्ष  पनि भए । ‘काठमाण्डौ एनिमल ट्रिटमेन्ट सेन्टर’मा पनि उनले अध्यक्ष भएरका काम गरे । त्यस संस्थाले बाटोमा हिड्ने भुस्याहा कुकुरहरुलाई विष खुवाएर मार्न नपरोस् भनेर  परिवार नियोजन गर्ने गर्थ्यो । लुतो आएर छटपटिएका कुकुरहरुलाई सफा गरिदिने अनि उपचार गरिसके पछि भने त्यसलाई जहाँबाट ल्याएको हो त्यहि ठाउँमा लगेर छोडिदिने त्यहाको नियम थियो । तर दुर्भाग्य त्यो संस्था अहिले बन्द छ । यो संस्थालार्ई लण्डनकी जेन शल्टर भन्ने महिलाले शुरु गरेकीहुन् । उनले आफू रिटायर्ड भएको पैसा ल्याएर यो संस्थाको  शुरुवात गरेकि थिइन ।


रेडियो अडियोले हरिबंशको जन्मदिन बिशेष बनायो :

नेपालका प्राय सबै हास्य कलाकारको जन्मदिन बिशेष प्रकारले मनाउने परम्परानै बसालेको रेडियो अडियोले बरिष्ठ हास्य अभिनेता हरिबंश आचार्यको जन्मदिन पनि पनि बिशेष प्रकारले मनाएको छ । उनलाई जन्मदिनको शुभकामना दिनका निम्ति वरिष्ठ हास्य कलाकार मदनकृष्ण श्रेष्ठ, दिपकराज गिरी,सिताराम कट्टेल, कुन्जना घिमिरे, किरण केसी,शिवहरी पौडेल,जितु नेपाल,शिशिर वांदेल लगायतका कलाकारहरुको उपस्थिती रहेको थियो । सबैले आ आफ्नो तर्फबाट बरिष्ठ हास्यकलाकार हरिबंशलाई शुभ कामना दिएका थिए । हरिबंश अचार्यलाई रेडियो अडियो, फर सि नेटवर्क र गफगाफ डटकमको तर्फ बाट जन्मदिनका अबसरमा सु स्वास्थ्य र दीर्घ जीवनको कामना ।