गत बर्ष बिदेशी सहायत १ अर्ब ७ करोड ४० लाख अमेरिकी डलर

Posted on: April 16, 2017 | views: 338

काठमाडौं ।

गत आर्थिक वर्षमा मुलुकमा विकास सहायता परिचालन अघिल्लो आर्थिक वर्षको तुलनामा ५.२२ प्रतिशतले बढेर एक अर्ब सात करोड ४० लाख अमेरिकी डलर पुगेको छ ।


कूल परिचालित सहायतामध्ये अनुदान ५० प्रतिशत, ऋण ३५ प्रतिशत र प्राविधिक सहायता १५ प्रतिशत रहेको छ ।


आइतबार अर्थ मन्त्रालयमा सार्वजनिक गरिएको गत आर्थिक वर्षको विकास सहायता प्रतिवेदनका अनुसार, गत आर्थिक वर्षमा सबैभन्दा बढी सहायता परिचालन गर्ने बहुपक्षीय विकास साझेदारमा विश्व बैंक र द्विपक्षीय विकास साझेदारमा संयुक्त राज्य अमेरिका रहेका थिए ।


गत आर्थिक वर्षमा कूल परिचालन भएको बैदेशिक सहायतामध्ये ६३ प्रतिशत राष्ट्रिय बजेट प्रणाली मार्फत परिचालन भएको छ भने ऊर्जा क्षेत्रमा परिचालन भएको सहायता सबैभन्दा बढी रहेको छ ।


प्रतिवेदनका अनुसार, गत आर्थिक वर्षमा मध्यमाञ्चल विकास क्षेत्रमा सवैभन्दा बढी २५ करोड ३२ लाख अमेरिकी डलर र सुदूर पश्चिमाञ्चल विकास क्षेत्रमा सबैभन्दा कम सात करोड ५७ लाख अमेरिकी डलर विकास सहायता परिचालन भएको छ ।


वैदेशिक सहायतामा संचालित आयोजना तथा कार्यक्रमहरुमध्ये संघीय मामिला तथा स्थानीय विकास मन्त्रालयमा सबैभन्दा बढी ६५, स्वास्थ्य मन्त्रालयमा ६१, कृषि विकास मन्त्रालयमा ५० र महिला, बालबालिका तथा समाज कल्याण मन्त्रालयमा ४० आयोजना तथा कार्यक्रमहरु संचालनमा रहेका छन् ।


गत आर्थिक वर्षको विकास सहायता प्रतिवेदन सार्वजनिक गर्नुहुँदै उपप्रधानमन्त्री एवं अर्थमन्त्री कृष्णबहादुर महराले देशको माग, आवश्यकता र राष्ट्रिय मूल नीति अनुसार वैदेशिक सहायता परिचालन गर्न सरकार अडिग रहेको र पछिल्लो समयमा सोही अनुसार वैदेशिक सहायता परिचालन गर्न विकासका साझेदारहरु सहमत रहेको बताउनुभयो ।


अर्थ सचिव डा. शान्तराज सुबेदीले राष्ट्रिय आयोजना बैंकका आधारमा बैदेशिक सहायता लिने तर सानातिना छरिएका आयोजनाहरुका लागि भने वैदेशिक सहायता नलिने मान्यतामा अर्थ मन्त्रालय रहेको बताउनुभयो ।