कम ऊर्जा खपतका लागि एलइडी बल्ब

Posted on: April 06, 2017 | views: 308

काठमाडौं ।

मुलुकलाई विद्युतभार कटौती मुक्त गरेपछि सरकारले व्यवस्थित रुपमा विद्युत् उपलब्ध गराउन र कम ऊर्जा खपतको बानी बसाल्नेतर्फ नागरिकको ध्यान केन्द्रित गर्ने भएको छ । 


ऊर्जामन्त्री जनार्दन शर्माले नेपाल विद्युत् प्राधिकरणलाई व्यवस्थित रुपमा विद्युत् उपलब्ध गराउनेतर्फ कार्ययोजनासहित काम गर्न निर्देशन दिनुभएको छ । मन्त्री शर्माको निर्देशनपछि प्राधिकरणले सिएफएल चिमको सट्टा दुई करोड एलइडी बल्ब खरिद गर्ने तयारी गरेको छ । 


कम ऊर्जा खपत गर्ने बल्ब प्रयोगपछि साँझको समयमा विद्युत् उपभोगको मात्रा घट्ने प्राधिकरणले जनाएको छ । 


ऊर्जाको प्रस्तावमा अर्थ मन्त्रालयले एलइडी बल्ब खरिदका लागि बजेट विनियोजन गरिसकेको नेपाल विद्युत् प्राधिकरणका कार्यकारी निर्देशक कुलमान घिसिङले जानकारी दिनुभयो । 


कार्यकारी निर्देशक घिसिङले प्राधिकरणलाई अगाडि बढाउन जनताको सहभागिता बढाउने, सेयर जारी गर्ने र निर्माणाधीन आयोजनालाई तोकिएको समयमा सम्पन्न गराउनेतर्फ ध्यान दिइएको बताउनुभयो ।