हिल्टन होटल अनुमतिमा आर्थिक अनियमीतताको आशंकामा महानगरमा छापा

Posted on: February 09, 2017 | views: 366

२७ माघ, काठमाडौं ।
अख्तियार दुरुपयोग अनुसन्धान आयोगले नक्शालमा निर्माणाधीन ट्री हिल्टन होटलको कागजात काठमाडौं महानगरपालिकाबाट नियन्त्रणमा लिएको छ ।

अख्तियारको टोलीले निर्माणस्थलको स्थलगत अनुगमन गरेपछि कागजात नियन्त्रणमा लिएको हो ।

होटल निर्माणमा आर्थिक अनियमितता भएको आशंकामा छानबिनका लागि बिहीबार बिहान कागजात नियन्त्रणमा लिइएको अख्तियार स्रोतले बतायो ।

यसअघि व्यवस्थापिका संसदको सुशासन तथा अनुगमन समितिले पनि महानगरपालिकाले हचुवाको भरमा निर्माण अनुमति दिएको निष्कर्ष निकालेको थियो । सुशासन तथा अनुगमन समितिले पनि त्यसबारे छानबिन गरिरहेको छ ।

होटल निर्माणको क्रममा नक्शाल(भगवतीबहाल सडक भासिएको छ । सडक भासिएपछि करिब एक महिनादेखि सो सडकमा यातायातका साधन चल्न सकेका छैनन् ।

निर्माणस्थल वरपरका घरहरुसमेत चर्किएका छन् । स्थानीयबासीले निर्माण कम्पनिलाई कारबाही गर्न माग गर्दै आएपनि सरकारी निकायमा जिम्मेवार व्यक्तिहरु मौन रहँदै आएका छन् ।

जगदम्बा हस्पिटालिटीले होटल निर्माणको जिम्मा लिएको छ । तर उसले ठूला संरचना बनाउँदा आवश्यक पर्ने वातावरणीय प्रभाव मूल्यांकन 'इआइए' समेत नगरेको बताइन्छ ।