बाणिज्य बैंकको एटिएम सेवा सञ्चालन

Posted on: January 24, 2017 | views: 258
११ माघ, विदुर । सबैभन्दा सस्तो दरमा ऋण प्रवाह गर्ने र ग्रामीण समुदाय माझ सेवा पु-याउन क्रियाशिल रहेको राष्ट्रिय बाणिज्य बैंकले नुवाकोटको विदुरमा सोमबारदेखि एटिएम सेवा सञ्चालनमा ल्याएको छ । बाणिज्य बैंक शाखा कार्यालय विदुरले ९१औँ स्थानको रुपमा एटिएम सेवा सञ्चालनमा ल्याएको जनाएको छ । विदुर शाखा कार्यालयले नेपाल र भारतभर सञ्चालन हुने गरी भिसा कार्ड उपलब्ध गराई ग्राहकहरुको लागी रकम झिक्न चेक मार्फत नै गर्नुपर्ने कारोबारको झण्झटिलो व्यवस्था हटाएको छ । एक पटकमा २० हजार रुपैयाँ र दिनमा पाँच पटकसम्म गरी एक लाख रुपैयाँ निकाल्न सक्ने गरी विदुर शाखा कार्यालयबाट सुरु गरेको एटिएम सेवाको शाखा प्रबन्धक यज्ञबहादुर बस्नेतले उद्घाटन गर्नुभएको हो । राष्ट्रिय बाणिज्य बैंकले अत्याधुनिक सेवा प्रवाह गरी ग्रामीण जनताको घरघरमा सेवा पु-याउन केन्द्रित हुने अभियान अन्तरगत विदुर शाखामा एटिएम सेवा सञ्चालन ल्याएको शाखा प्रबन्धक बस्नेतले बताउनुभयो । बाणिज्य बैंक विदुरमा चालु आर्थिक वर्षको पुस मसान्तसम्ममा २३ करोड २ लाख रुपैयाँ निक्षेप संकलन गरी ५३ करोड रुपैयाँ कर्जा लगानी गर्दै एक लाख ५९ हजार रुपैयाँ नाफा कमाउन सफल भएको शाखा प्रबन्धक बस्नेतले जानकारी दिनुभयो । राष्ट्रिय बाणिज्य बैंक विदुर शाखामा कर्जाको लागी सात सय ३१ ग्राहक रहेका छन् भने निक्षेप तर्फ ९ हजार ६ सय १९ ग्राहक सङ्ख्या रहेका छन् । सरकारी बैंकको रुपमा सर्वसाधारणलाई सेवा पु¥याउन सक्रिय रहेको बैंकले कृषि कर्जा र अनुदान सहितको कृषि कर्जाको लागी लोकप्रिय रहदै आएको छ ।