धितोपत्र दर्ता तथा निस्काशन नयाँ नियमावली मंसीर १ गतेदेखि लागु

Posted on: November 13, 2016 | views: 277

काठमाडौं ।                                             
नेपाल धितोपत्र बोर्डले सरकारले हालै स्वीकृति गरेको धितोपत्र दर्ता तथा निष्काशन नियमावली, २०७३ आगामी मंसीर १ गतेदेखि लागू गर्ने भएको छ ।

साविकको धितोपत्र दर्ता तथा निष्काशन नियमावली, २०६५ लाई प्रतिस्थापन गरी मंसीर १ गतेदेखि लागू गरिने नयाँ नियमावलीमा अन्तर्राष्ट्रिय वित्तीय संस्थाले स्थानीय मुद्रामा ऋणपत्र जारी गर्न पाउने र वास्तविक क्षेत्रका संगठित संस्थाहरुले न्यूनतम दश प्रतिशत मात्र पनि सार्वजनिक निष्काशनमा जान पाउने व्यवस्था गर्न पाउने व्यवस्था गरिएको छ ।

यसैगरी, प्रिमियममा धितोपत्र निष्काशन गर्न सक्ने व्यवस्थालाई बजारमैत्री गर्ने, स्वार्थ बाझिने गरी धितोपत्रको निष्काशन/वितरण गर्न नपाउने, संगठित संस्थाहरुले गर्ने सार्वजनिक निष्काशन, हकप्रद निष्काशन, नयाँ निष्काशन तथा अन्य निष्काशनलाई थप सरलीकृत गर्ने र सूचिकृत संगठित संस्थाहरुको गाभ्ने गाभिने कार्यपछिको धितोपत्र दर्ता कार्यलाई सहजीकरण गर्ने लगायतका व्यवस्थाहरु नयाँ नियमावलीमा रहेको बोर्डले आइतबार जारी गरेको प्रेस–विज्ञप्तिमा जनाइएको छ ।

नियमावली लागू भएपछि वास्तविक क्षेत्रका संगठित संस्थाहरुको बजार प्रवेशलाई प्रोत्साहन मिल्ने, दोस्रो बजार विस्तार भई बजारको संरचनात्मक सुधार हुने र अन्तर्राष्ट्रिय वित्त निगम, एसियाली विकास बैंक जस्ता अन्तर्राष्ट्रिय वित्तीय संस्थाहरुले स्थानीय मुद्रामा जारी गर्ने ऋणपत्रबाट बजारको विस्तारमा नयाँ अध्याय थपिने बोर्डको विश्वास रहेको छ ।