तिहारलाई मात्रै भारतबाट ६० लाखको फुल किनिंदै

Posted on: October 24, 2016 | views: 292

८ कार्तिक, काठमाडौं ।
नजिकँदो तिहार पर्वका लागि यस वर्ष भारतबाट ६० लाख मूल्य बराबरको सयपत्री फूलको माला आयात गर्ने योजना फूल व्यवसायीहरुले बनाएका छन् ।

गत बर्ष तिहारमा एक लाख ५० हजार माला आयात गरेकोमा यस वर्ष दुई लाख माला आयात गर्ने योजना रहेकोे फ्लोरिकल्चर एसोसिएसन नेपालका अध्यक्ष कुमार कसजु श्रेष्ठले बताउनुभयो ।

अध्यक्ष श्रेष्ठले गत वर्षभन्दा यस बर्ष फूलको माला केही सस्तो हुने र  प्रतिमाला बढीमा  ८० सम्ममा पाइने बताउनु भयो ।

तिहारमा नेपालमा हरेक वर्ष झन्डै  डेढ अर्ब मूल्य बराबरको फूलको कारोबार हुने गरेको छ । तिहारमा मात्र मुलुकभर करिब ११ लाख मालाको कारोबार हुने गरेको छ ।

तीमध्ये नौ लाख माला नेपालमै उत्पादन भएको फूलबाट बन्दछन् । नेपालमा प्रयोग हुने मालाको ४० प्रतिशत खपत काठमाडौँ उपत्यका नै हुने गरेको एसोसिएसनले जनाएको छ ।

नेपालमा लगभग १४७ हेक्टर क्षेत्रफलमा ४०० प्रजातिका फूल उत्पादन भइरहेको तथा पुष्प व्यावसायवाट ४१ हजारभन्दा बढी व्यक्ति प्रत्यक्ष वा अप्रत्यक्ष रूपमा लाभान्वित भएका छन् ।