सिंचाइ असुविधा र जलवायु परिवर्तनले अछाममा खाद्यान्न अपुग

Posted on: October 16, 2016 | views: 286

३० असोज, अछाम ।
अछाम जिल्लामा यस बर्ष १५ हजार मेट्रिक टन खाद्यान्न अभाव हुने भएको छ ।

गत आर्थिक बर्षको हिउँदमा लामो खडेरीका कारण गहुँ लगायत हिउँदे बाली उत्पादनमा कमी आएपछि करिब १५ हजार मेट्रिक टन खाद्यान्न अभाव हुने जिल्ला कृषि विकास कार्यालय अछामले जनाएको छ ।

जलबायु परिवर्तनका कारण पानी नपरेको, अधिकाँस जमिनमा सिँचाइ सुविधा नभएको लगायतका कारणले खाद्यान्न उत्पादन घटेको बताईएको छ । जिल्ला कृषि विकास कार्यालयका अनुसार जिल्लाको अनुमानित जनसंख्या २ लाख ७५ हजार तीन सय २८ लाई बार्षिक रुपमा ६० हजार मेट्रिक टन प्रशोधित खाद्यान्न आवश्यक पर्छ ।

गत बर्ष लामो खडेरीका कारण गहुँ उत्पादनमा करिब ३० प्रतिशत कमी आएपछि १५ हजार दुई सय ४१ मेट्रिक टन प्रशोधित खाद्यान्न अपुग हुने र अपुग खाद्यान्न बाहिरी जिल्लाबाट आयात गर्नुपर्ने बरिष्ठ कृषि विकास अधिकृत कृष्णहरि देबकोटाले जानकारी दिनुभयो ।

यश बर्षको खाद्यान्न अपुगको मात्रा आर्थिक बर्ष २०७२र७३ को भन्दा पाँच गुणाले बढी हो । अघिल्लो आर्थिक बर्ष गहुँ र धान उत्पादन राम्रो भएपछि करिब ३ हजार मेट्रिक टन खाद्यान्न मात्र अपुग भएको कृषि विकास कार्यालयले जनाएको छ ।

हाल अछाममा ५६ हजार चार सय ४७ हेक्टरमा खेति गरिँदै आएको छ । जसमा नियमित र मौसमी गरि १० हजार हेक्टरमा मात्रै सिँचाइ सुविधा रहेको बरिष्ठ कृषि विकास अधिकृत देबकोटाको भनाई छ ।