भोजपुरमा दशैं मनाउन पनि चामल भएन, खाद्य संस्थानले पनि बाँडेन

Posted on: October 08, 2016 | views: 375

२२ असोज, भोजपुर ।
नेपाल खाद्य संस्थान भोजपुरको गोदाममा चामलको मौज्दात नभएपछि संस्थानले दशैको समयमा चालम बिक्री गरेन ।

यस बर्षको चामलको ढुवानी ठेक्का नलागेको र गोदाममा चामलको मौज्दात समेत सकिएकाले दशैको समयमा गोदामबाट चामल बिक्री नगरिएको संस्थानले जनाएको छ । केही समय अगाडीसम्म गोदाममा मौज्दात रहेको चामल बिक्री गरिएको भए पनि दशैको समयमा भने बिक्री गर्न नसकिएको नेपाल खाद्य संस्थान भोजपुरका प्रमुख भक्तबहादुर भण्डारीले बताए ।

सदरमुकाम बाहेकका खाद्य संस्थानका डिपो अहिलेसम्म पनि सम्वन्धित निकायको बेवास्ताका कारण पुनस्थापना हुन नसक्दा ती स्थानहरुबाट समेत चालम बिक्री हुन सकिरहेको छैन ।

भोजपुर सदरमुकाम देखि दक्षिणमा रहेको घोरेटार डिपोमा अत्याधिक मात्रमा खाद्यन्नको माग हुने गरेको भए पनि त्यहाँ अहिलेसम्म पनि डिपो संचालन हुन नसकेको हो । नेपाल खाद्य संस्थान भोजपुरका शाखा प्रमुख तथा सूचना अधिकारी भक्तबहादुर भण्डारीले पटक पटक डिपो संचालनका लागि प्रधान कार्यालयमा माग गर्दा समेत सुनुवाई हुन नसकेको बताए ।

संस्थानले २०६० सालमा द्वन्द्वको समयमा बिस्थापित भएको घोरेटार डिपोबाट स्थानिय प्रहरी र राजनीतिक दलको रोहवरमा ठेकेदारले ढुवानी गरेको चामल बिक्री हुने गरेको छ । घोरेटार डिपोबाट दक्षिणी क्षेत्रका १५ बढी गाविसका स्थानियहरु लाभान्वित हुने गरेता पनि त्यहाँ माग अनुसार डिपो संचालन हुन नसक्दा बितरण हुन सकिरहेको छैन ।

खाद्यान्नको लागि ठेक्का लाग्ने प्रक्रिया हुदै छ त्यस पछि मात्र भोजपुरमा यस आर्थिक बर्षका लागि खाद्यन्न ढुवानी हुन्छ संस्थानका प्रमुख भण्डारीको भनाई रहेको छ । संस्थानले प्रधान कार्यालयको निर्णय अनुसार अरुवा सोना मन्सुली चामल ३६ र जिरा मन्सुली चामल ५० रुपैया ५० पैसा प्रतिकेजीका दरले बिक्री गर्दैै आइरहेको थियो ।