नेपाल वायुसेवाले दुई एयर बस किनेर जापान सहित खाडीका देशमा उडान थप्ने

Posted on: September 26, 2016 | views: 612

१० असोज, काठमाडौं  ।
राष्ट्रिय ध्वजाबाहक नेपाल वायु सेवा निगमले थप दुईवटा एयर बस किन्ने प्रक्रिया अघि बढाएको छ ।

अन्तराष्ट्रिय उडानका लागि दुई वटा नयाँ एयर बस खरिदको प्रक्रिया सुरु गरेको निगमले बताएको छ ।

विमान खरिदका लागि नेपाल सरकार जमानी बसेपछि कर्मचारी संचयकोषले वायु सेवा निगमलाई २५ अर्ब रुपैयाँ ऋण दिने निर्णय भएपछि निगमले बिमान खरीद प्रक्रिया थालेको हो ।

वाइड बडी भएका नयाँ विमान आएपछि खाडी मुलुकका साथै जापान, कोरिया लगायतका गन्तव्यमा उडान गर्ने निगमले बताएको छ ।

वायु सेवा निगमले विमान खरिदका लागि भनेर बोलपत्र आहृवान गरेको छ ।

ए ३००९२०० एयर बसका लागि एयर बस, एयरलाइन्स कम्पनीहरु र विमान भाडामा लिएका कम्पनीहरुले टेण्डर भर्न सक्नेगरि डेण्डर खुलाइएको छ ।

टेण्डरका लागि ४५ दिनको समय दिइएको छ । खरिद प्रक्रियाका सबै काम सकेर अर्को असोजमा पहिलो र चैतमा अर्को विमान ल्याइसक्ने लक्ष्य छ ।

वायु सेवा निगमसँग अहिले दुई वटा बोइङ र दुई वटा न्यारो बडीको एयरबस छ ।

वायुसेवा निगमले दुवई लगायतका खाडी देशमा उडान बढाएको छ भने अन्य खाडीका देश सहित जापानबाट समेत उडानको माग बढेको छ ।

हाल जापानमा ६० हजार बढी नेपाली रहेका छन् । दुई दशक अघिसम्म जापानबाट सिधा नेपाल उडान भर्दै आएको वायुसेवा त्यसपछि धराशायी बन्दा ५ बर्षअघि एक समय अन्र्तराष्टिय उडान विहिन बन्न पुगेको थियो ।

हाल नयाँ विमान खरीद र यसको चुस्तप्रशासनमा ध्यान दिएर सरकारले सहयोग गरेपछि वायुसेवा निगम तंग्रिने अवस्थामा पुगेको छ ।

स्मरणीय छ जापानमा सफल व्यवसायीको रुपमा चिनिएका एनआरएन उपाध्यक्ष समेत रहेका भवन भट्टले पनि जापानबाट नेपाल सिधा उडान गर्नेगरि दुई बर्षभित्रमा निजि लगानीमा बिमान खरीद प्रक्रिया अघि बढाइसकेको बताएका छन् ।