बगरमा माछा पालन

Posted on: September 24, 2016 | views: 358

८ असोज, धनकुटा ।
तीन दशकको लामो प्रयास पछि आफ्नै प्रबिधिमा खोलाको तथबन्धन गर्न सफल भएपछि धनकुटाका एक व्यक्तिले २३ लाख खर्चेर त्यसै खेर गईरहेको बगरमा माछा पालन शुरु गर्नुभएको छ ।

धनकुटा बुढिमोरङ्ग गाबिस ५ का ६४ बर्षिया देव ईवाहाङ्ग लिम्बुले जिल्लाकै भेडेटार गाबिस स्थित फलामेटारको लेउती खोलामा रहेको आफ्नो ३५ रोपनी खोला बगिरहेको बगर जमिनको तथबन्धन गरेर व्यबसाय शुरु गर्नुभएको हो ।

२०४१ सालको बाढीले बगेको जमिन मा अनेकौ प्रबिधि अपनाउँदा पनि खोला पसेर पटक पटक जमिन बगाएपछि  लिम्बुले २०७२ सालमा आफ्नै अनुभवमा अपनाएको ‘करुवा’ बिधिको तथबन्धन सफल भएपछि व्यबसाय शुरु गर्नुभएको लिम्बुले जानकारी दिनु भयो ।

हाल १० रोपनी क्षेत्रफलमा ४ वटा ठूला पोखरी निर्माण गरी १८ हजार बिभिन्न जातका माछा लगाएर व्यबसाय शुरु गरेको लिम्बुले आगामी ५ बर्ष भित्रमा सबै जमिनमा माछापालन पुरा गर्ने लक्ष रहेको जानकारी दिनुभयो ।

हाल नीजि १० लाख र माछापुछ्रे बैंक धनकुटा शाखाको १३ लाख लगानी रहेको उक्त बगरको माछा फर्म निर्माण पुरा भएपछि उक्त स्थानमा माछाको परिकार खुवाउने होटल सन्चालन गरिने लिम्बुले जानकारी दिए ।

हाल धनकुटामा धनकुटामा ४ हेक्टर क्षेत्रफलमा ४ दशमलव ९६ मेट्रिकटन माछा उत्पादन हुने जिल्ला कृषि बिकास कार्यालयको तथ्यांक छ ।