अलैंचीको मूल्य घट्दा पुर्वका किसान मर्कामा

Posted on: September 15, 2016 | views: 189

३० भदौ, ताप्लेजुङ ।
पुर्वी पहाडी जिल्लाको प्रमुख आम्दानीको स्रोत मानिएको अलैंची मुल्य ओरालो लाग्ने क्रम यो साता पनि रोकिएन । मुल्य लगातार तीनसातायता ओरालो लागि रहेको छ ।

बिहिवार पहाडका जिल्लामा अलैंचीको मुल्य ५९ हजार प्रतिमनका दरले कारोवार भएको अलैंची व्यवसायी महासंघले जनाएको छ ।

महासंघका अध्यक्ष निर्मल भट्टराईका अनुसार पछिल्लो तीनसातामा मात्र अलैंचीको मुल्यमा प्रतिमन २३ हजारले गिरावट आएको छ ।

उहाँका अनुसार भदौ पहिलो साता पहाडी बजारमा अलैंचीको मुल्य ८२ हजार प्रतिमन रहेको थियो ।

भारतीय बजारबाट माग कम आएकोले मुल्य निरन्तर ओरालो लागेको  भट्टराईले जानकारी दिनुभयो ।

नयाँ उत्पादन बजारमा आउन लाग्दा मुल्यमा देखिएको निरन्तरको गिरावट प्रति पहाडी क्षेत्रका अलैंची उत्पादक र किसान भने चिन्तित हुन थालेका छन् ।