भूकम्प पिडितलाई घर बनाउन पैसा वितरण व्यवस्थित बनाउन सांसदको माग

Posted on: September 01, 2016 | views: 371

१६ भदौ, काठमाडौं ।
व्यवस्थापिका संसदको आजको बैठकमा सांसदहरुले भूकम्प प्रभावित क्षेत्रमा आवास अनुदान वितरण कार्यलाई व्यवस्थीत रुपमा अघि बढाउन सरकारको ध्यानाकर्षण गराउनु भएको छ ।

वैठकमा सांसदरुले भूकम्प पिडितले जाडोका लागि दिईएको न्यानो अहिलेसम्म नपाएको भन्दै त्यो लापरवाहीको छानविन गरी कारवाही गर्न सरकारसँग माग गर्नुभयो ।

सांसदहरुले स्थानिय तहको निर्वाचन सम्बन्धी विधेयक तत्काल ल्याउन सरकारसँग माग गर्नुभयो ।

उहाँहरुले देशमा व्याप्त भ्रष्टाचार र कालावजारी नियन्त्रणका लागि सरकारले विशेष कार्ययोजना ल्याउनु पर्नेमा पनि सकारको ध्यानाकर्षण गराउनु भयो ।

सांदहरुले सरकार गठन भएको एक महिना वितिसक्दा समेत संसदमा एकपटक पनि प्रधानमन्त्री नआएको भन्दै संसदमा उठाइएका विषयमा संसदमा प्रत्येक दिन एक÷ एक जना मन्त्रीले जवाफ दिने व्यवस्था मिलाउन सभामुखलाई आग्रह गर्नुभयो ।

बैठकमा सांसदहरुले उर्जा संकट समाधानका लागि अघिल्लो सरकारले तयार पारेको उर्जा सम्बन्धी विधेक संसदमा आउन नसकेको, सिन्डिकेट हटाउन नसक्दा यात्रुहरु मार खेप्न बाध्य भएकाले सरकारी यातायातको व्यवस्था गर्नु आवश्यक रहेको, मातृभाषामा सुधार गर्ने नाममा राष्ट्रभाषालाई छिन्न भिन्न गर्न खोजिएको लगायतका विषयमा सरकारको ध्यानाकर्षण गराउनु भएको थियो ।

यसैगरी प्रधानमन्त्री पुष्पकमल दाहाल प्रचण्डले उपप्रधानमन्त्री एवं गृहमन्त्री विमलेन्द्र निधिमार्फत भारतलाई पठाएको पत्रका विषयमा उठेको विवादबारे संसदमा जानकारी गराउन पनि सांसदहरुले माग गर्नु भयो ।

बैठकमा सांसदहरु रामहरी खतिवडा, अग्नीप्रसाद सापकोटा, चित्रबहादुर केसी, जनकराज जोशी, सुवोधकुमार पोखरेल, रामनारायण विडारी, अनिता देवकोटा, रामअयोध्या यादवलगायतकाहरुले सडक दुर्घटनाको न्युनीकरण, दुर्घटना धेरै हुने सडक क्षेत्रमा ट्रमा सेन्टरको स्थापना, वनजंगल फडानीको नियन्त्रण, भ्रष्टाचारको नियन्त्रण लगायतका विषयमा सरकारको ध्यानाकर्षण गराउनु भएको थियो ।