३ सय २२ अमेरिकी उद्योगको नेपालमा ७ अर्ब लगानी

Posted on: June 19, 2016 | views: 529

६ असार, काठमाडौं ।
संयुक्त राज्य अमेरिकास्थित विभिन्न ३२२ उद्योगले नेपालका विभिन्न क्षेत्रमा करिव सात अर्ब ३३ करोड रुपियाँ लगानी गर्न स्वीकृति पाएका छन् ।

अमेरिकी उद्योगमध्ये सबैभन्दा बढी १४८ उद्योगले नेपालको सेवा क्षेत्रमा करिव दुई अर्ब ७० करोड रुपियाँ लगानीका लागि स्वीकृति पाएको उद्योग विभागले जनाएको छ ।

यसैगरी, अमेरीकाका ७० उद्योगले नेपालका उत्पादनमूलक क्षेत्रमा करिव दुई अर्ब १० करोड, ८० उद्योगले पर्यटन क्षेत्रमा करिव एक अर्ब दुई करोड, तीन उद्योगले ऊर्जा क्षेत्रमा करिव एक अर्ब २९ करोड र २० उद्योगले कृषि तथा वनजन्य क्षेत्रमा करिव २१ करोड रुपियाँ लगानीका लागि स्वीकृत प्राप्त गरेको उद्योग विभागको तथ्याङ्कमा उल्लेख छ ।

नेपालमा २०४६ सालदेखि हालसम्म विश्वका ८७ देशका जम्मा तीन हजार ५७८ भन्दा बढी उद्योगले लगानीका लागि स्वीकृति प्राप्त गरेका छन् ।

यसैबीच, उद्योग विभागले विदेशी उद्योग दर्ता प्रक्रियाको सहजताका लागि विभागले अनलाइन सेवा छिट्टै सञ्चालनमा ल्याउन लागेको उद्योग विभागका महानिर्देशक महेश्वर न्यौपानेले जानकारी दिनुभयो ।