ठूला आयोजना के भइरहेको छ ? सिसिटिभिबाट अर्थमन्त्री देखी प्रधानमन्त्रीले हेर्ने

Posted on: June 16, 2016 | views: 782

३ असार, काठमाडौं ।

आगामी आर्थिक वर्षदेखि ठूला ठूला आयोजनाहरुको कार्य प्रगतिको अनुगमन केन्द्रबाट प्रत्यक्षरुपमा गर्नका लागि अर्थ मन्त्रालयमा प्रोजेक्ट वाच रुम स्थापना गरिने भएको छ ।

आगामी आर्थिक वर्षको बजेटमा भएको व्यवस्था अनुसार मन्त्रालयमा प्रोजेक्ट वाच रुम स्थापना गर्नका लागि आवश्यक तयारी भइरहेको अर्थ मन्त्रालयका सहसचिव एवं प्रवक्ता मुकुन्द पौडेलले जानकारी दिनुभयो ।

विश्वका विभिन्न देशमा ठूला आयोजनाहरु समयमा नै सम्पन्न गर्नका लागि प्रयोगमा ल्याइएको प्रोजेक्ट वाच रुम नेपालमा पहिलो पटक प्रयोगमा ल्याउन लागिएको र यसबाट पूँजीगत खर्च बढाउन तथा आयोजनाहरु समयमै सम्पन्न गर्न महत्वपूर्ण योगदान पुग्ने उहाँले बताउनुभयो ।

अर्थ मन्त्रालयमा स्थापना हुने प्रोजेक्ट वाच रुममा रहने भिडियो स्क्रिनबाट नियमितरुपमा अर्थमन्त्री र अर्थसचिवले सबै ठूला आयोजनास्थलमा भइरहेका कामहरुको प्रत्यक्ष अनुगमन गरेर लक्ष्य अनुसार काम भए नभएका बारेमा सम्बन्धित आयोजना प्रमुखबाट जानकारी लिने, समस्या भए समाधानका लागि पहल गर्ने र लक्ष्य अनुसारको काम नभएको भए तत्काल कामलाई तीब्रता दिन निर्देशन दिनुहुने सहसचिव पौडेलले स्पष्ट गर्नुभयो ।

प्रोजेक्ट वाच रुम बाट प्रधानमन्त्रीले पनि आकस्मिकरुपमा मुलुकका कुनै पनि भागमा संचालित ठूला आयोजनाहरुको स्थलगतरुपमा भइरहेका कामको प्रत्यक्ष अनुगमन गर्नुहुने पनि सहसचिव पौडेलले जानकारी दिनुभयो ।