नेपाल लाइफ इन्स्योरेन्सको सेयर कारोबार रोक्न निर्देशन

Posted on: June 11, 2016 | views: 333

२९ जेठ, काठमाडौं ।
नेपाल धितोपत्र बोर्डले नेपाल लाइफ इन्स्योरेन्सको सेयर कारोबार रोक्न नेपाल स्टक एक्स्चेन्जलाई निर्देशन दिएको छ ।

बोर्डले शुक्रबार नेपाल स्टक एक्स्चेन्जलाई पत्र पठाएर  फरदर पब्लिक अफरिङ 'एफपिओ' जारी गर्ने विषयमा बोर्डमा आवेदन नदिई कम्पनीले सूचना जारी गरेको भन्दै सेयर कारोबार रोक्न निर्देशन दिएको जनाएको छ ।

बोर्डमा अहिलेसम्म निवेदन दिइएको छैन, पहिले नै सूचना प्रकाशित गर्दा बजार मूल्यमा चलखेल हुनसक्ने र लगानीकर्ता ठगिन सक्ने भएकोले वास्तविक अवस्था बुझन स्टकलाई त्यस्तो निर्देशन दिएको धितोपत्र बोर्डका कार्यकारी निर्देशक निरज गिरीले जानकारी दिनु भयो ।

नेपाल लाइफले प्रति कित्ता २९ सय ५१ रुपैयाँमा एफपिओ जारी गर्ने जनाएको थियो । १०० रुपैयाँ अंकित दरको सेयरमा कम्पनीले २८५१ रुपैयाँ प्रिमयम जोडेर बिहीबार विवरण सार्वजनिक गरेपछि पुँजीबजारमा सेयरको मुल्य प्रतिकित्ता चार सय रुपैयाँले बढेको थियो ।

बोर्डले नेप्सेलाई पठाएको पत्रमा आधिकारिक रुपमा मूल्य निर्धारण नगराई, बजारलाई प्रभावित गर्ने हिसावले सूचना दिएको कारण कारोबार रोक्नु पर्ने उल्लेख गरिएको छ ।