साल्ट ट्रेडिङले बोनस र नगद लाभांश बाड्ने

Posted on: June 08, 2016 | views: 218

२६ जेठ, काठमाडौं ।
साल्ट ट्रेडिङ कर्पोरेशनले गत आर्थिक वर्षमा आर्जन गरेको खूद मुनाफाबाट शेयरधनीहरुलाई १५ प्रतिशत बोनस शेयर र १० प्रतिशन नगद लाभांश वितरण गर्ने भएको छ ।

बुधबार काठमाडौंमा सम्पन्न कर्पोरेशनको ४८ औं वार्षिक साधारण सभाले कर्पोरेशनले गत आर्थिक वर्षमा ६ अर्ब ९६ करोड रुपियाँको कारोबार गरी आर्जन गरेको ५६ करोड ९ लाख रुपियाँबाट शेयर धनीहरुलाई बोनस शेयर र नगद लाभांश वितरण गर्ने निर्णय गरेको हो ।

त्यस अवसरमा साल्ट ट्रेडिङ कर्पोरेशनका संचालक समितिका अध्यक्ष लक्ष्मीदास मानन्धरले सरकारको नीति अनुरुप कर्पोरेशनले मुलुकभर गृुणस्तरीय वस्तुहरु आपूर्ति गर्दै आएको र व्यापार विविधकिरण गर्दै जाने क्रममा काठमाडौं, विर्तामोड, सिमरा, नारायणगढ, भैरहवा र नेपालगञ्जमा पेट्रोल पम्प संचालनमा ल्याउने तयारी गरिरहेको बताउनुभयो ।

साल्ट ट्रेडिङ कर्पोरेशनका प्रमुख कार्यकारी अधिकृत उर्मिला श्रेष्ठले सरकारले उपलब्ध गराएको कोटा अनुरुप कर्पोरेशनले चालू आर्थिक वर्षमा ८५ हजार मेट्रिक टन रासायनिक मल आयात गरेको र आगामी आर्थिक वर्षका लागि पनि २० हजार मेट्रिक टन रासायनिक मल आयात गर्न प्रक्रिया अगाडि बढाइसकेको जानकारी दिनुभयो ।

प्रमुख कार्यकारी अधिकृत श्रेष्ठले सरकारको निर्णय अनुरुप एक प्रतिशत भन्सार सुविधामा ३० हजार मेट्रिक टन चिनी आयात गर्न समेत कर्पोरेशनले प्रक्रिया अगाडि बढाइसकेएको स्पष्ट गर्नुभयो ।

कर्पोरेशनको साधारण सभापश्चात् आयोजित कार्यक्रममा साल्ट ट्रेडिङ कर्पोरेशनको संचालक समितिका तत्कालीन सदस्य समेत रहनुभएका नेपाल चेम्बर अफ कमर्सका पूर्वअध्यक्ष स्वर्गीय ईश्वरलाल श्रेष्ठको स्मृतिमा प्रकाशित पुस्तक ‘स्मृतिमा ईश्वरलाल’ सार्वजनिक गरिएको थियो ।