राष्ट्रिय परिचयपत्र लागू गर्न सरकार असफल,८६ करोड अनुदान गुम्ने खतरा

Posted on: May 02, 2016 | views: 286

काठमाडौं,फागुन १२ । राष्ट्रिय परिचयपत्र लागू गर्न सरकार असफल भएपछि दातृनिकायबाट प्राप्त ८ मिलियन अमेरिकी डलर अनुदान सहायता गुम्ने अवस्थामा पुगेको छ । पूर्वप्रतिबद्धताअनुसार राष्ट्रिय परिचयपत्रका रुपमा बायोमेट्रिक स्मार्ट कार्ड लागू गर्न सरकार विफल बनेपछि एसियाली विकास बैंक (एडिबी)बाट प्राप्त करिब ८६ करोड रुपैयाँ अनुदान सहयोग गुम्ने स्थिति आएको हो ।

फागुन १६ भित्र स्मार्टकार्डको काम अघि नबढे एडिबीले अनुदान सहायतासम्बन्धी सम्झौता रद्द गर्नेछ । त्यसपछि उक्त काम सञ्चालनमा आए त्यसको सम्पूर्ण खर्च सरकारले बेहोर्नुपर्ने हुन्छ ।

संसद्को सार्वजनिक लेखा समितिको निर्देशनपछि गृह मन्त्रालयअन्तर्गको राष्ट्रिय परिचयपत्र व्यवस्थापन केन्द्रले एडिबीसँगको सम्झौताअनुसार कुनै पनि काम अघि बढाएको छैन । स्मार्टकार्ड लागू गर्ने सम्बन्धमा केन्द्रले परामर्शदाता र कम्पनी छनोट गरिसकेको थियो ।

सोही आधारमा एडिबीले २ स्विस परामर्शदाता पनि चयन गरिसकेको थियो । तर, सो जिम्मेवारी आर्थिक प्रलोभनमा परेर विदेशी कम्पनीलाई दिन लागिएको तथा राष्ट्रिय सुरक्षामा समेत खतरा उत्पन्न हुनसक्ने भन्दै उजुरी परेपछि केन्द्रले सबै प्रक्रिया स्थगन गरेको आजको कारोबार दैनिकमा खबर छ ।