प्रधानमन्त्री भन्छन्-'राष्ट्रको ढुकुटी जनताको उन्नतिका लागि वितरण गर्न मुखी बजेट ल्यायौं'

Posted on: May 29, 2016 | views: 415

१७ जेठ, काठमाडौं ।
प्रधानमन्त्री केपी शर्मा ओलीले जनताको करबाट संकलन राष्ट्रको ढुकुटी जनताको उन्नतिका लागि नदिएर अर्थ मन्त्रालय र राष्ट्र बैंकमा पोको पारेर राख्न नचाहेकोले सरकारले वितरणमुखी बजेट ल्याएको वताउनु भएको छ ।

बजेटबारे छलफल गर्न नयाँ बानेश्वरमा बसेको एमाले संसदीय दलको बैठकलाई सम्बोधन गर्दै प्रधानमन्त्री ओलीले जनताले बुझाएको पैसा जनताको उत्थान र देशको विकासका लागि खर्च गर्न थालेकाले त्यसमा सहयोग गर्न आग्रह गर्नु भयो ।

प्रधानमन्त्री ओलीले विकासको प्रस्थान वर्ष बनाउने नीतिका साथ इतिहासमै सर्बश्रेष्ठ बजेट ल्याएको बताउनु भयो ।

प्रधानमन्त्री ओलीले बजेटपछि सरकार ढल्ने हल्लाका पछि नलाग्न सांसदहरुलाई आग्रह गर्दै सरकारको नेतृत्वका विषयमा माओवादीको नेतृत्वसँग कुनै गोप्य सम्झौता नभएको बताउनु भयो ।

प्रधानमन्त्रीले बजेट राम्रो छ भन्न प्रतिपक्षी दलका नेताहरुलाई दलीय अप्ठेरो परेकोले उहाँहरुको विरोध गर्ने अधिकारलाई आफूले सम्मान गर्ने बताउनु भयो ।

कार्यक्रममा अर्थमन्त्री विष्णुप्रसाद पौडेलले प्रतिपक्षलाई बजेट मन नपरेको नभई  सरकारले बढी लोकप्रियता प्राप्त गर्ने चिन्ताले आलोचना गरेको बताउनु भयो ।

एमाले प्रमुख सचेतक भानुभक्त ढकालले बजेट एकदमै राम्रो भएकोे जनमत भएकाले सबै सांसदलाई बजेटका पक्षमा दृढतापूर्वक उभिन निर्देश गर्नुभयो ।