कामदार अभावले फलाखुको काम रोकियो

Posted on: February 05, 2020 | views: 816

वेत्रावती । कामदार अभावका कारण देखाउदै रसुवाको नौकुण्ड गाउँपालिका वडा न. १ थाङ्दोरमा निर्माण भइरहेको फलाखु खोला जलविद्युत् आयोजनाको काम ठप्प भएको छ । बर्खाको समयमा काम नगर्ने भन्दै गएको असारमा चिनियाँ कामदार फर्किएपछि सात महिनादेखि काम रोकिएको हो । पछिल्लो समय चीनमा कोरोना रोगको भाइरसको प्रकोप सुरु भएसँगै अझै केही समय कामदार आउने सम्भावना नरहेको आयोजना पक्षले जनाएको छ । १४ दशमलब ७ मेगावाटको आयोजनाको काम सुरुभ एको डेढ वर्षमा ३० प्रतिशत काम सकिएको छ भने निर्माण सम्पन्न गर्ने गरी काम अघि बढाउनको लागी प्रथामिकता दिइएको आयोजना पक्षले जनाएको छ । 

आयोजनाले जग्गा अधिग्रहण, प्रशारणलाइन निर्माण, बाटो र क्याम्प निर्माण सम्पन्न भएसँगै संरचना निर्माणको काम अघि बढाइएको भएपनि कामदार अभावले काम रोकिएको बेत्रावती हाइड्रोइलेक्ट्रिक कम्पनीले जनाएको छ । आयोजनाको सुरक्षाका लागि रसुवामा रहेको नेपाली सेनाको कालीजंग गणले पहरा दिदै आएको छ । फलाखु खोला जलविद्युत् आयोजना निर्माणमा दुई अर्ब ४० करोड रुपैया लगानी लाग्ने प्रक्षेपण गरिएको छ ।