रसुवागढी नाका बन्द

Posted on: January 22, 2020 | views: 426

टिमुरे । अन्तराष्ट्रिय नाकाको रुपमा परिचित रसुवागढी नाकाबाट १५ दिनका लागि आयात–निर्यात बन्द गर्न लागिएको छ । ल्होसार पर्वको कारण चीनमा सार्वजनिक बिदा हुने भएकाले आयात र निर्यात प्रभावित हुने चिनियाँ पक्षले जनाएको छ । 
चिनियाँ भन्सारका अनुसार हिजैदेखि त्यहाँ सार्वजनिक बिदा दिइएको छ । यसअघि नै ६० वटा गाडीमा सिल गरिएकाले ती गाडी नेपाल आउन दिएर नाका बन्द गर्न लागिएको छ । सार्वजनिक बिदा सकिएपछि मात्रै त्यहाँ सिल लगाउने काम सुरु हुने नेपाली व्यवसायी पुरुषोत्तम पौडेलले जानकारी दिनुभयो । चीनको केरुङमा रहेका व्यापारी तथा व्यवसायी सोमबारदेखि नै फर्कन थालेका छन् ।
यसैगरी चीनको केरुङभन्दा १७ किलोमिटर दक्षिणमा पर्ने स्थानमा पहिरो गएपछि चिनियाँ पक्षले मुलाडाँडामा यातायात सेवा बन्द गरेको जनाएको छ । सिल लागेका गाडीहरू तल आउन नसकेर केरुङ तथा पाङसिङमा नै रोकिएका छन् । सडक नखुल्दा सिल लगाइएका गाडीसमेत नेपाल आउनबाट रोकिएका छन् । जारी रहेको सडक खुलाउने काम अझै केही दिन लाग्ने चिनियाँ पक्षले जनाएको छ ।