राजश्व संकलन उत्साहजनक

Posted on: January 18, 2020 | views: 3160

विदुर । नेपाल सरकारले लक्ष्य अनुसारको राजश्व संकलन गर्न नसकिरहेको समयमा रसुवा भन्सार कार्यालयले भने झण्डै दोब्बर बढी राजश्व संकलन गर्न सफल भएको छ । साउनदेखि पुससम्मको ६ महिनामा रसुवा भन्सारले लक्ष्यभन्दा ७७ प्रतिशत बढी राजस्व संकलन गरेको छ । कार्यालयका अनुसार पुसमा महिनामा ४६ करोड ७८ लाख लक्ष्य राखिएकोमा ८२ करोड ८३ लाख राजस्व संकलन भएको हो । कार्यालयले चालु आर्थिक वर्षको साउनदेखि पुस अन्तिमसम्ममा ७ अर्ब ३३ करोड ८९ लाख रुपैयाँ राजस्व संकलन गर्न सफल भएको हो । यो भन्सार कार्यालयको वार्षिक लक्ष्यको ७८ प्रतिशत रहेको पाइएको छ । कार्यालयले यस वर्ष ९ अर्ब ३५ करोड रुपैयाँ राजस्व उठाउने लक्ष्य लिएको छ । 

कार्यालयका अनुसार साउनमा एक अर्ब ३ करोड, भदौमा १ अर्ब ५१ करोड र असोजमा १ अर्ब ३८ करोड रुपैयाँ राजश्व संकलन गरेको जनाएको छ । यसैगरी, कार्तिकमा १ अर्ब ४७ करोड, मंसिरमा १ अर्ब ९१ लाख र पुसमा महिनामा ४६ करोड ७८ लाख रुपैयाँ राजस्व संकलन गरेको जनाएको छ । आर्थिक वर्षको साउनदेखि पुस मसान्तसम्म सडक अवरोध नभएको र परियोजनाको सामग्रीको आयात बढेको कारण राजस्व संकलनमा लक्ष्य भन्दा बढी जम्मा गर्न सफल भएको प्रमुख भन्सार अधिकृत पुण्यबिक्रम खड्काले जानकारी दिनुभएको छ ।