मध्यभोटेकासीको शेयर खुल्दै

Posted on: January 18, 2020 | views: 551

विदुर । मध्यभोटेकासी जलविद्युत् कम्पनीले सर्वसाधारणका लागि छुट्याएको एक अर्ब ५० करोड रुपैयाँ बराबरको १ करोड ५० लाख कित्ता साधारण सेयर निष्कासन गर्ने भएको छ ।

नेपाल विद्युत् प्राधिकरणको सहायक कम्पनीको रुपमा रहेको चिलिमे जलविद्युत् कम्पनी मार्फत सञ्चालनमा ल्याउन लागिएको १०२ मेगावाट क्षमताको मध्यभोटेकोसी कम्पनीले स्थानीयवासी र सर्वसाधारणका लागि सेयर निष्कासन गर्न लागेको जनाएको छ । स्वपुँजीतर्फको स्थानीयवासीका लागि ६० करोड रुपैयाँ र सर्वसाधारणका लागि ९० करोड रुपैयाँ बराबरको सेयर निष्कासन गर्न लागिएको कम्पनीले जनाएको हो । कम्पनीका अनुसार, सर्वसाधारणलाई दिइने १५ प्रतिशत अर्थात ९० लाख कित्ता तथा स्थानीयबासीलाई दिइने १० प्रतिशत अर्थात ६० लाख कित्ता सेयर निष्कासनको तयारी अन्तिम चरणमा पुराएको छ ।

सेयर निष्कासनका लागि कम्पनीले नागरिक लगानी कोषसँग ‘सेयर प्रत्याभूति सम्बन्धी सम्झौता’ गरेको कम्पनीमा प्रमुख कार्यकारी अधिकृत मणिकुमार काफ्लेले जानकारी दिनुभएको छ ।

कम्पनीले यसअघि पहिलो चरणमा कर्मचारी संचयकोषमा रकम संचित गर्ने संचयकर्ताका लागि १९ दशमलव ५ प्रतिशत अर्थात १ करोड १७ लाख कित्ता शेयर उपलब्ध गराइसकेको जनाएको छ ।

यसैगरी, संस्थापक कम्पनीका कर्मचारीका लागि ३ दशमलव ५ प्रतिशत अर्थात २१ लाख कित्ता र ऋणदाता संस्थाका कर्मचारीका लागि १ प्रतिशत अर्थात ६ लाख कित्ता शेयर वितरण गरिसकेको छ । यसअघि कम्पनीले कुल एक करोड ४४ लाख कित्ता अर्थात १ अर्ब ४४ करोड बराबरको सेयर निष्कासन गरी बाँडफाँट गरिसकेको र अब रसुवामा रहेका अति प्रभावित र जिल्लाबासीको लागी १ करोड ५० लाख कित्ता साधारण सेयर निष्कासनको तयारी अन्तिम चरणमा पुराएको त्यसको लागी आवेदन दिन तयारी अबस्थामा रहन तथा खर्चको बन्दोबस्ती मिलाउन कम्पनीले आग्रह गरेको छ ।