दुई देशबीच को ‘लेबल’ विवाद अझै मिलेन

Posted on: January 17, 2020 | views: 3045

विदुर । नेपाल र चीनको स्थानीय बजारमा खपत हुने खाद्य वस्तुको ‘लेबल’ विवाद भन्सार तहको बार्ताबाट समस्या समाधान हुन नसकेको रसुवा भन्सार कार्यालयले जनाएको छ ।

नेपालको भन्सार विभाग र तिब्बतको ल्हासा भन्सार विभागका अधिकारीबीच काठमाडौंमा भएको बार्तामा समसया समाधानको लागी सहमति जुट्न नसकेको रसुवा भन्सार कार्यालयका प्रमुख पुण्यविक्रम खड्काले जानकारी दिनुभएको छ । उहाँको अनुसार छलफलमा नेपाली अधिकारीले चीनबाट नेपाल निर्यात हुने खाद्य वस्तुमा नेपाली कानुनअनुसार अंग्रेजी भाषाको लेबल उल्लेख गरिदिन आग्रह गरेका थिए भने अंग्रेजी भाषामा लेबल भएका नेपाली खाद्य वस्तु निर्वाध रुपमा चीनमा प्रवेश पाउनुपर्ने प्रस्ताव गरेको थियो । तर, चिनीयाँ पक्षले आफ्नो सबै नागरिकले अंग्रेजी भाषा नबुझ्ने भएकाले स्थानीय बजारमा खपत हुने सामान्य खाद्य वस्तुको लेबल चिनियाँ भाषामा नै हुनुपर्ने अडान कायम राखेपछि बैठक बिना निष्कर्ष टुङ्गिएको हो । 

ल्हासा भन्सार विभागका उपमाहानिर्देशक मिङ्मा छिरिङले आफूहरुले राखेको माग पूरा नहुने हो भने सहमति नहुने जनाएर अडान राखेपछि समस्या समाधानको लागी नेपाली पक्षले पनि यस विषयमा सहमति गर्न नसकिने भन्दै समाधानको लागी अब वाणिज्य तहबाटै समाधान खोज्नुपर्ने देखिएको प्रमुख भन्सार अधिकृत खड्काले बताउनुभएको छ । चिनियाँ भाषामा लेवल नलेखिएको खाद्य वस्तु निर्यातमा चिनियाँ भन्सारले रोकेको छ भने नेपाली पक्षले पनि चिनियाँ भाषामा मात्रै लेबल लेखिएको खाद्य वस्तु आयात बन्द गरेको छ ।

पछिल्लो ६ महिनादेखि लेबलका कारण देखिएको समस्याले दुई देशबीच अचार, रोटीका परिकार, तारेका माछा, बिस्कुट, चाउचाउ लगायतका खाद्यान्नको आयात निर्यात प्रभावित हुदै आएको छ ।