अर्थ मन्त्रालय नयाँ बजेट बनाउँदै

Posted on: May 03, 2016 | views: 248

२६ चैत, काठमाडौं ।
व्यवस्थापिका संसद्मा हरेक वर्षको जेठ १५ गते अर्थमन्त्रीले बजेट पेश गर्नुपर्ने संविधानमा व्यवस्था भए अनुरुप आगामी आर्थिक वर्षको बजेट निर्माणको प्रक्रियालाई तीब्रता दिइएको अर्थ मन्त्रालयले जनाएको छ ।

शुक्रबार अर्थ मन्त्रालयमा रेडियो नेपालसँग कुरा गर्दै अर्थ मन्त्रालयका बजेट महाशाखा प्रमुख एवं सहसचिव रामशरण पुडासैनीले आगामी बजेटका नीति र कार्यक्रम सम्बन्धमा राष्ट्रिय योजना आयोग, अर्थ मन्त्रालय र विभिन्न मन्त्रालयहरुबीचको छलफल अन्तिम चरणमा पुगेको जानकारी दिनुभयो ।

सहसचिव पुडासैनीले आगामी आर्थिक वर्षको बजेट मुलुकलाई आर्थिक सम्वृद्धितिर लैजाने, आत्मनिर्भर बनाउने र संघीयता कार्यान्वयनमा सघाउने गरी आउने बताउनुभयो ।

सहसचिव पुडासैनीले रणनीतिक पूर्वाधार निर्माणमा लगानी बढाउने, सरकारले नै नेतृत्व गरेर लगानीको वातावरण बनाउने र नयाँ नयाँ आर्थिक अवसरहरु सिर्जना गर्नेतर्फ बजेटमा जोड दिइने बताउनुभयो ।

आगामी बजेट यथार्थमा आधारित, कार्यान्वयनयोग्य र प्रतिफल निष्कने क्षेत्रमा लगानी केन्द्रित गर्ने गरी आउने उहाँले स्पष्ट गर्नुभयो ।

एक प्रश्नको जवाफमा सहसचिव रामशरण पुडासैनीले भूकम्पबाट क्षतिग्रस्त संरचनाहरुको पुनर्निर्माणका लागि राष्ट्रिय पुनर्निर्माण प्राधिकरणलाई ६५ अर्ब रुपियाँ खर्चको अख्तियारी दिइसकिएको, त्यो खर्च भए थप नौ अर्ब र त्यत्तिले पनि नपुगे अन्यत्र खर्च नभएको रकम समेत व्यवस्थापन गरी अर्थ मन्त्रालयले उपलब्ध गराउने जानकारी दिनुभयो ।