माथिल्लो त्रिशूली थ्री ‘ए’को परीक्षण उत्पादन सफल, तीन दिनमै ढेड करोड आम्दानी

Posted on: May 21, 2019 | views: 1177

रामहरि न्यौपाने,
शन्तिबजार । रसुवामा बाँध र नुवाकोटमा विद्युत उत्पादनगृह रहेको ६० मेगावाट क्षमताको माथिल्लो त्रिशूली थ्री ‘ए’ जलविद्युत आयोजनाले उत्पादन गरेको विद्युत राष्ट्रिय प्रशारण प्रणालीमा थपिएको छ ।
गत शुक्रबार साँझ पाच बजेदेखि सुरु गरिएको उत्पादन परीक्षण सोमबार साँझ पूरा भएको हो । आयोजनाको पहिलो युनिट लगातार तीनदिन (७२ घण्टा) सञ्चालनको अवधिमा शतप्रतिशत हुन आउने प्रतिघण्टा ३० मेगावाट विद्युतको उत्पादन सफल रुपमा गरिएको आयोजनाका उपप्रबन्धक ई.सत्यराम ज्याख्वाले जानकारी दिनुभयो ।

उहाँको अनुसार आयोजनाको पहिलो युनिटमा निरन्तर लोड (विद्युत उत्पादन) दिएर गरिएको परीक्षण मा कुनै ह्रास तथा समस्या उत्पन्न नभई साँझ पाँच बजे परीक्षणको अवधि सम्पन्न गरिएको छ ।
तीन दिनको परीक्षण अवधि र नेपाल विद्युत प्राधिकरणका कार्यकारी निर्देशक कुलमान घिसिङको बिहीबारको अवलोकनको क्रममा सञ्चालन गरिएको समयमा समेत गरेर आयोजनाबाट २६ लाख २० हजार ८०० युनिट (२,६२०.८० मेगावाट) विद्युत उत्पादन भएको छ । उक्त विद्युत थ्री ‘ए’ मार्फत नै निर्माण गरिएको त्रिशूली–काठमाडौ २२० केभी ‘डबल सर्किट’ प्रशारण लाइन मार्फत काठमाडौको मातातिर्थ शवस्टेशनमा लगेर राष्ट्रिय प्रशारण प्रणालीमा जोडिएको छ । उक्त विद्युतलाई सरदर प्रतियुनिट ६ रुपैयाँको दरमा बिक्री गर्दा नेपाल विद्युत प्राधिरकणले करोड ५७ लाख २४ हजार ८०० रुपैयाँ आम्दानी गर्न सफल भएको छ ।


आपूर्तिको माग बढिरहेको अहिलेको सुख्खायाममा थप भएको उक्त विद्युत राष्ट्रिय प्रशारण प्रणालीमा थपिएसगै विद्युत अभावमा महत्वपूर्ण राहत महशुस भएको आयोजनाका सहायक निर्देशक नारायणप्रसाद आचार्यले जानकारी दिनुभयो ।
उहाँको अनुसार आयोजनाको एक युनिटको परीक्षण सफल भएसगैँ सोमबार साँझदेखि कम्तिमा आठ दिनको लागी पहिलो युनिटलाई पुनःपरीक्षणको लागी बन्द गरिएको छ । “यो अवधिमा निर्माण पक्षले आयोजनाको सम्पूर्ण संरचनाको सुक्ष्म रुपमा पुनःपरीक्षण गर्दछ ।” आचार्यले भन्नुभयो “पहिलो युनिटको तीनदिनको परीक्षण सफल भएकाले पुनःपरीक्षण सफल हुने र त्यसपश्चात निरन्तर सञ्चालनमा ल्याइनेछ ।”

पहिलो चरणमा प्रथम युनिटबाट ३० मेगावाट विद्युत उत्पादनको परीक्षणमा सफलता हासिल गरेको आयोजनाले आगामी असार दोश्रो सातासम्ममा दोश्रो युनिटबाट थप ३० मेगावाट विद्युत उत्पादन गर्ने लक्ष्यको साथ अन्तिम चरणमा पुगेको निर्माण कार्यलाई थप तिव्र बनाएको छ ।

यस आयोजनामा नेपाल सरकार र नेपाल विद्युत प्राधिकरणको सयुक्त लगानी रहने गरी चीन सरकारको सहुलियतपूर्ण ऋण सहयोगमा एक्जिम बैंक, चीनले आर्थिक व्यवस्थापन गरेको छ । आयोजना निर्माणको लागत १२ करोड ५७ लाख अमेरिकी डलर लाग्ने प्रारम्भिक अनुमान छ ।