त्रिशूली थ्री ‘ए’को शुक्रबारदेखि परीक्षण उत्पादन सुरु

Posted on: May 17, 2019 | views: 1287

रामहरि न्यौपाने,
विदुर । रसुवामा बाँध र नुवाकोटमा विद्युत उत्पादनगृह रहेको ६० मेगावाट क्षमताको माथिल्लो त्रिशूली थ्री ‘ए’ जलविद्युत आयोजनाले आज (शुक्रबार)देखि उत्पादन परीक्षण सुरु गरेको छ ।
आयोजना निर्माणसंग सम्बन्धित सम्पूर्ण तयारी पूरा भएसगैँ बिहीबार गरिएको उत्पादन परीक्षण सफल देखिएपछि आज साँझ पाँच बजेदेखि परीक्षण उत्पादन सुरु गरेको आयोजना प्रमुख फणिन्द्रराज जोशीले जानकारी दिनुभयो । उहाँको अनुसार आयोजनाको पहिलो युनिट ३० मेगावाट क्षमताको टवाईन घुमाएर लगातार ७२ घण्टा परीक्षण गरिनेछ । उक्त अवधिको परीक्षण सफल भएमा आयोजनाबाट निरन्तर ३० मेगावाट क्षमताको विद्युत उत्पादन गरेर केन्द्रीय प्रशारण लाइनमा जोडिनेछ ।


आयोजनाको बिहीबार नेपाल विद्युत प्राधिकरणका कार्यकारी निर्देशक कुलमान घिसिङले अवलोकन गरेपश्चात नुवाकोटको किस्पाङ गाँउपालिका–५ स्थित विद्युत उत्पादन गृहको स्विचयार्डको कन्ट्रोल कक्षमा स्विच दबाएर आयोजनाबाट उत्पादन भएको विद्युत राष्ट्रिय प्रसारण प्रणालीमा जोडिएको घोषणा गर्नुभएको थियो ।


आयोजनाबाट विद्युत उत्पादन र प्रशारण लाइनको तत्कालीन परीक्षण सफल देखिएपछि कार्यकारी निर्देशक घिसिङले निरन्तर परीक्षण गरेर सञ्चालनमा ल्याउने बताउनुभएको हो ।
पहिलो पटक पहिलो युनिटबाट ३० मेगावाट विद्युत उत्पादन हुने छ भने असार दोश्रो सातासम्ममा दोश्रो युनिटबाट थप ३० मेगावाट विद्युत उत्पादन हुने आयोजनाका उपप्रबन्धक ई.सत्यराम ज्याख्वाले जानकारी दिनुभयो ।
उहाँको अनुसार पहिलो युनिटको विद्युत केन्द्रीय प्रशारण लाइनमा जोडिएपछि दोश्रो युनिटको परीक्षण सुरु गरिनेछ ।

“विभिन्न विवाद र प्राकृतिक विपत्तिका कारण अन्योल अबस्थामा पुगेको आयोजनाबाट विद्युत उत्पादन सुरु गर्न लागिएको छ ।” उपप्रबन्धक ज्याख्वाले भन्नुभयो “आयोजनाको सफलताले सहायक योजना थ्री ‘बी’ निर्माण सुनिश्चितता र त्रिशूली–काठमाडौ प्रशारण लाइन विस्तारमा योगदान पुगेको छ ।”

यो आयोजनाको निर्माण चाइना गेजुवा गु्रप अफ कम्पनी (सिजिजिसी) मार्फत गरिएको हो । उक्त कम्पनीले सन् २०११ जुनदेखि काम सुरु गरेको हो । निर्माणको लागी सो कम्पनीसंग इन्जिनियरिङ, प्रोक्युरमेन्ट एवम् कन्स्ट्रक्सन (ईपिसी) अवधारणामा सम्झौता भएको हो ।
ईपिसी मोडेलमा निर्माण गरिएको नेपाल विद्युत प्राधिकरणको यो पहिलो जलविद्युत आयोजना हो ।

आयोजनामा नेपाल सरकार र नेपाल विद्युत प्राधिकरणको सयुक्त लगानी रहने गरी चीन सरकारको सहुलियतपूर्ण ऋण सहयोगमा एक्जिम बैंक, चीनले रकम उपलब्ध गराएको छ । आयोजना निर्माणको लागत १२ करोड ५७ लाख अमेरिकी डलर रहेको आयोजना पक्षले जनाएको छ ।


विसं २०७२ बैशाख १२ को विनासकारी भूकम्पले धेरै क्षति पु-याएको यस आयोजनाको मुख्य संरचना निर्माणमा निर्माण व्यवसायीलाई हालसम्म कुनै ‘भेरिएशन’ दिइएको छैन । भूकम्पले आयोजनाको बाँधस्थलसम्म पुग्ने पहुँच मार्गमा पु-याएको ठूलो क्षतिको पुर्ननिर्माण र त्यहाँ दीर्घकालीन रुपमा पहिरो रोकथाम सम्बन्धि कार्यको लागी भने नेपाल सरकार मन्त्रिपरिषद्को निर्णय अनुुसार नेपाली सेना खटाइएको थियो । सेनाले उक्त कार्यको जिम्मेवारी अन्तरगत पहुँच मार्ग खुला गरेपछि आयोजनाको काम अघि बढाउन सहज बनेको हो । पहिरो रोकथामको कार्य सेनाको निर्माण कार्यदलले अन्तिम चरणमा पु¥याएको जनाएको छ ।
त्रिशूली नदीको पानीबाट ‘रन अफ रिफर’ मोडलमा निर्माण भएको यस आयोजनाबाट बार्षिक ४८९.७६ गिगावाट घण्टा विद्युत उत्पादन हुने लक्ष्य छ । आयोजना पूर्ण रुपमा सञ्चालन आए पश्चात यहाँबाट उत्पादन हुने विद्युतबाट बार्षिक करीब रु तीन अर्ब आम्दानी गर्दछ ।

त्रिशूली नदी स्थित रसुवाको डाँडाँगाँउमा बाँध बनाएर नुवाकोटको मनकामनामा उत्पादन गृह रहेको आयोजनाको निमार्ण सबै भूमिगत (पहाड भित्र) बनाइएको छ ।
आयोजनाबाट साढे आठ महिना पूर्णरूपमा (६० मेगावाट) विद्युत उत्पादन हुनेछ । कुल उत्पादनको ४६.६ प्रतिशत विद्युत सुख्खायाममा उत्पादन हुने भएकाले मुलुकको लागी आवश्यक विद्युत उपलब्ध गराउन यस आयोजनालाई महत्वका रुपमा हेरिएको आयोजनाका सहायक निर्देशक नारायणप्रसाद आचार्यले जानकारी दिनुभयो ।

उहाँको अनुसार नुवाकोट र रसुवामा उत्पादन हुने विद्युत केन्द्रीय प्रशारण लाइनमा जडानको लागी थ्री ‘ए’ को व्यवस्थापनमा २२० केभी ‘डलब सर्किट’ प्रशारण लाइनको निर्माण सम्पन्न भइसकेको छ ।
यसैगरी, यस आयोजनाको क्यासकेड आयोजनाको रुपमा ३७ मेगावाट क्षमताको थ्री ‘बी’ आयोजनाको निर्माण जारी छ । थ्री ‘बी’लाई आगामी तीन वर्षभित्र पूरा गर्नेगरी विस. २०७४ फागुनदेखि निर्माण थालिएको छ ।