रसुवागढी भन्सार : चीनबाट आयात उत्साह, नेपालबाट निर्यात निरास

Posted on: January 27, 2019 | views: 962

अनु आचार्य,
टिमुरे (रसुवा) । राजश्व संकलनमा रसुवा भन्सार कार्यालय सक्षम बन्दै गएको छ ।

चीनसंगको एकमात्र व्यापारिक नाकाको रुपमा सञ्चालनमा रहेको रसुवागढी नाकाबाट कारोबार बढेसगैँ भन्सार असुलीमा रसुवा भन्सार कार्यालय सक्षम ठहरिदै गएको हो । विसं २०१३ सालमा स्थापना भएको भन्सार कार्यालय टिमुरे विनासकारी भूकम्पको कारण सिन्धुपाल्चोकको तातोपानी नाका बन्द भएपछि एकाएक चम्किएर राजश्व संकलनमा लक्ष्यभन्दा निकै बढी गुणा संकलन गर्न सफल ठहरिएको छ । विसं २०७२ सालमा गएको बिनासकारी भुकम्पदेखि हालसम्म रसुवा भन्सार कार्यालय टिमुरेले १५ अर्ब रुपैयाँ भन्दा बढी राजश्व असुली गरेको भन्सार प्रमुख पुण्यबिक्रम खड्काले जानकारी दिए ।

अन्तराष्ट्रिय भन्सार दिवसको अवशरमा टिमुरेमा शनिबार अयोजित कार्यक्रममा कार्यालयले दिएको जानकारी अनुसार आर्थिक वर्ष २०७२÷०७३ मा दुई अर्ब चार करोड रुपैयाँ राजश्व संकलन गरेको थियो । भूकम्पपछि केरुङ नाका सञ्चालनमा आएसगै चम्किएको यस नाकाबाट आव २०७३÷०७४ मा दुई अर्ब ९२ करोड रुपैयाँ राजश्व संकलन गरेको थियो भने आव २०७४÷०७५ मा चार अर्ब ५९ करोड रुपैयाँ राजश्व संकलन भएको भन्सार प्रमुख खड्काले बताए ।
यस नाकाले चालु आव २०७५÷०७६ मा सात अर्ब १५ करोड रुपैयाँ राजश्व संकलन गर्ने लक्ष्य लिएको छ ।

पछिल्लो ६ महिनामा पाँच अर्ब ६१ करोड रुपैयाँ राजश्व संकलन भइसकेको कार्यालयले जनाएको छ । यो चालु आवको राजश्व संकलनको लक्ष्यको ८० प्रतिशत हो । “बाढी र पहिरोले भदौदेखि असोजसम्म एक महिना भन्दाबढी नाकाबाट आवतजावत प्रभावित हुदाँपनि लक्ष्य भन्दाबढी राजश्व संकलनले चीनसंगको व्यापारलाई उत्साहको रुपमा देखाएको छ ।” भन्सार प्रमुख खड्काले भने “राजश्वमा अब्बल भएर मात्र के गर्नु भौतिक संरचनाको जीर्ण अबस्थाले कर्मचारीलाई भने निराश बनाएको छ ।”


भाडाको घरमा सञ्चालनमा रहेको कार्यालयसंग श्रोत, साधन, दक्ष जनशक्ति र आधुनिक उपकरणको अभाव छ । सुख्खा बन्दरगाह निर्माणमा भएको ढिलाई र हालको यार्ड साँघुरो हुदाँ कर्मचारीलाई काम गर्न कठिनाई छ ।

आयात उत्साह, निर्यात निराशाजनक :
चीनसंग सञ्चालनमा रहेको एकमात्र व्यापारिक नाका रसुवागढीमा पछिल्लो समय निर्यात भन्दा आयातको दर निकै बृद्धि छ । ६३ अर्ब २२ करोड ६७ लाख रुपैयाँको सामाग्रि आयात भएकोमा यहाँबाट भने तीन अर्ब ७४ करोड ६० लाख रुपैयाँ बराबरको सामाग्रि मात्र निर्यात भएको भन्सार कार्यालयले जनाएको छ ।


आव २०७२÷०७३ मा रसुवागढी नाकाबाट १० अर्ब ६५ करोड ४५ लाख रुपैयाँको सामान आयात भएकोमा यहाँबाट ६१ करोड १५ लाख रुपैयाँको सामान निर्यात भएको थियो ।
आव २०७३÷०७४ मा १५ अर्ब ९७ करोड १७ लाख रुपैयाँको सामान आयात भएको थियो भने ७७ करोड ५३ लाख रुपैयाँको सामाग्रि यताबाट निर्यात भएको थियो ।

आव २०७४÷०७५ मा १९ अर्ब २५ करोड २३ लाख रुपैयाँको सामान आयात हुदाँ एक अर्ब ८२ करोड ७५ लाख रुपैयाँको सामाग्रि नेपालबाट चीनतर्फ निकासी भएको कार्यालयको तथ्याङ्क छ । चालु आवको साउनदेखि पुष मसान्सम्म १७ अर्ब ३४ करोड रुपैयाँको सामान आयात भएकोमा यहाँबाट भने ५३ करोड १६ लाख रुपैयाँको सामान निर्यात भएको रसुवा भन्सार कार्यालय टिमुरेले जनाएको छ । पछिल्लो तीन वर्षमा भन्सारमा आयातको तुलनामा निर्यात ५.९२ प्रतिशत मात्र भएको देखिन्छ ।