कम लगानीमै प्रतिफल बढाउन नुवाकोटका किसानलाई ट्याक्टर वितरण

Posted on: December 28, 2018 | views: 1380

रामहरि न्यौपाने,
नुवाकोट ।
प्रधानमन्त्री कृषि आधुनिकीरकण परियोजना, परियोजना कार्यान्वयन इकाई (तरकारी जोन) नुवाकोटले यहाँका किसानलाई १२० थान मिनीट्रिलर (ट्याक्टर) वितरण गरिएको छ ।

परियोजनामा आबद्ध भएका किसानलाई आधुनिकीकरण तथा व्यवसायीकरण गर्दै तरकारी खेतीको प्रबद्धनको लागी अनुदानमा खेतबारी जोत्न ट्याक्टर वितरण गरेको जोन प्रमुख डा.कमलराज गैरेले जानकारी दिनुभयो । उहाँको अनुसार किसानलाई उपलब्ध गराइएको ट्याक्टरमा रु २५ हजारसम्म तथा आधा रकम अनुदानमा दिइएको छ ।


“जोन कार्यालय विदुरको परिसरमा नै ट्याक्टर बिक्री गर्ने व्यावसायीलाई प्रदर्शनी गर्न लगाएर किसानलाई छनोट गर्ने अवसर दिएका छौ ।” जोन प्रमुख गैरेले भन्नुभयो “रु ३५ हजारदेखि रु ५५ हजारसम्म पर्ने विभिन्न चार किसिमका ट्याक्टर किसानले खरिदको लागी छनोट गर्न पाएका छन् ।”


परियोजनाले किसानलाई यान्त्रिकरण मार्फत खेती लगाउन सहयोग पु-याउने उद्देष्यले ट्याक्टर लिन चाहेकासंग प्रस्ताव माग गरेको थियो । सोही अनुसार ९१ वटा कृषि सहकारी, कृषि समूह र फार्म प्रस्तावक भएर आवेदन दिएका थिए ।
किसानको माग अनुसार हाल १२० थान ट्याक्टर उपलब्ध गराइएको आवश्यक परेमा थप समेत गरिने परियोजनाका कृषि अधिकृत कृष्णप्रसाद उपाध्यायले जानकारी दिनुभयो । उहाँको अनुसार किसानले गरेको प्रस्तावमा रहेर सात हर्ज क्षमताका रु ३५ हजारदेखि रु ५५ हजारसम्म पर्ने ट्याक्टर अनुदानमा उपलब्ध गराइएको हो ।


“किसानले खरिद गर्न चाहेको ट्याक्टरमा आधा रकम तथा बढीमा रु २५ हजारसम्म अनुदान दिइएको छ ।” कृषि अधिकृत उपाध्यायले भन्नुभयो “प्रति कृषि सहकारी सँस्थाहरुलाई तीन थान, कृषक समूहलाई दुई थान र कृषि फार्म सञ्चालन गर्दै आएका किसानलाई एक थान यान्त्रिकरण अनुदानमा दिइएको हो ।”


कार्यालयले उपलब्ध गराएको ट्याक्टरको सहायताले कम लगानीमा धेरै प्रतिफल निकाल्न सकिने जोन सञ्चालक समितिका अध्यक्ष रामप्रसाद पुडासैनीले बताउनुभयो । उहाँको अनुुसार खेती प्रणाली आधुनिकीकरण बनाउन यान्त्रिकरण अत्यावश्यक भएकाले ट्याक्टर वितरणले किसानलाई उत्साहित बनाएको छ ।


“गोरु पाल्न र हलो जोत्न जनशक्तिको अभावले खेती लगाउन कठिन बन्दै आएको छ ।” पुडासैनीले भन्नुभयो “कम लगानीमा छिट्टो काम गरेर व्यवसायिक बनाउन किसानलाई ट्याक्टरसगै अब कृषि उब्जनी ढुवानी गर्न सवारीसाधन समेत उपलब्ध गराउन लागिएको छ ।”


नुवाकोटमा गत आर्थिक वर्षदेखि सञ्चालनमा रहेको तरकारीको जोन कार्यक्रम यहाँको ककनी गाउँपालिकाको वडा नं. ८ बाहेक सातवटा वडा, शिवपुरी गाउँपालिकाको वडा नं. ६ समुन्द्रादेवी, वडा नंं. ७ सुनखानी र वडा नं. ८ थानापती, पञ्चकन्या गाउँपालिकाको वडा नं. ३ पञ्चकन्या, वडा नं. ४ थप्रेक र वडा नंं. ५ भदु्टार एंवम् दुप्चेश्वर गाउँपालिका वडा नंं. ३ रातउवेशी र वडा नंं. ५ बालकुमारीमा कार्यान्वयनमा छ । हाल जोनमा एक हजार ३७ किसान आबद्ध भएका छन् ।


छनोट क्षेत्रका किसान, कृषक समूह, कृषि फर्म, कृषि सहकारी सँस्था, कृषि सम्बन्धि जल उपभोक्ता समितिले गर्दै आएका तरकारी खेती सहित अब व्यावसायिक तरकारी खेती गर्न चाहेमा उनीहरुलाई विभिन्न सहायता कार्यक्रम सञ्चालनमा ल्याइएको छ । दश वर्षसम्म सञ्चालन हुने कार्यक्रमले छोटो अवधिमा कृषि पेशालाई सम्मानित बनाई किसानको जीवनशैलीमा कायलपलट गर्ने योजना बनाएको जोन प्रमुख गैरेले बताउनुभयो । उहाँको अनुसार हाल किसानलाई अनुदानमा फलामको स्थायी टनेल निर्माण, प्लाष्टिक पोखरी र भकारो सुधार कार्यक्रम समेत सञ्चालन भइरहेको छ ।


परियोजना मार्फत किसानलाई निःशुल्क प्राविधिक सहयोग, ८५ प्रतिशत अनुदानमा प्रयोगशाला सेवा, साना सिचाई पूर्वाधार र उत्पादन तथा कृषि व्यवसाय सेवाको पूर्वाधार, ५० प्रतिशत अनुदानमा कृषि औजार तथा उपकरण, कृषि उत्पादन सामाग्रि अन्तरगतका बीउ, बेर्ना, बिरुवा लगायतका सेवा सञ्चालनमा रहेको छ ।


प्रधानमन्त्री कृषि आधुनिकीरकण परियोजना मार्फत नुवाकोटमा तरकारीको जोन सहित आलुको जोन कार्यक्रम र चारवटा ब्लक र २१ वटा पकेट क्षेत्र सञ्चालनमा छ ।