विद्युत प्राधिकरण र मध्य त्रिशुली गंगाबीच पिपिएमा हस्ताक्षर

Posted on: December 24, 2018 | views: 423

गोकर्ण अधिकारी, नुवाकोट ।  नेपाल विद्युत प्राधिकरणले नुवाकोटमा निर्माणाधीन ‘मध्य त्रिशुली गंगा जलबिद्युत आयोजना’संग विद्युत खरिद बिक्री सम्झौता (पिपिए) गरेको छ ।


पर्पेmक्ट इनर्जी डेभलप्मेन्ट प्रालि प्रबद्धक रहेको १९.४१ मेगावाट क्षमताको आयोजना मार्फत उत्पादित विद्युत खरिदको लागी कम्पनी र नेपाल विद्युत प्राधिकरणबीच सम्झौता कार्य सम्पन्न भएको हो ।


दुई पक्षबीच भएको सम्झौता अनुसार आयोजनाबाट सुख्खायाममा (मंसिर १६ देखि जेष्ठ १५ सम्म) उत्पादन हुने विद्युत आठ रुपैयाँ ४० पैसा र वर्षायाममा (जेठ १६ देखि मंसिर १५ सम्म) उत्पादन हुने विद्युत चार रुपैयाँ ४०पैसामा खरिद गर्ने आयोजनाको प्रबद्धक पर्पेmक्ट इनर्जी डेभलप्मेन्ट प्रालिले विज्ञप्ती मार्फत जानकारी दिएको छ ।


सम्झौता पत्रमा नेपाल विद्युत प्राधिकरणको तर्पmबाट योजना, अनुगमन तथा सूचना प्रविधि निर्देशनालयका उपकार्यकारी निर्देशक जगदिश्वरमान सिंह र विद्युत व्यापार विभागका प्रमुख प्रबल अधिकारी तथा प्रबद्धक कम्पनीको तर्पmबाट कम्पनीका प्रबन्ध सञ्चालक भरतकुमार खड्का र आवशीय इञ्जिनियर देवेन्द्र बस्नेतले हस्ताक्षर गर्नुभएको छ ।


प्रबद्धक कम्पनीका आवसीय इञ्जिनियर बस्नेतको अनुसार दुई पक्षबीच गत मंगलबार पिपिए पत्रमा हस्ताक्षर भएको र बाँकी रहेको ‘अफिसियल’ प्रक्रिया आइतबार पूरा भएको हो ।
सम्झौता अनुसार आयोजनाले विसं.२०८० जेठ १७ सम्ममा निर्माण कार्य सम्पन्न गरी प्राधिकरणलाई विद्युत उपलब्ध गराउनुपर्ने उल्लेख छ । आयोजना क्यू सेभेन्टी मोडेलमा रहने छ ।


नुवाकोटको किस्पाङ गाँउपालिका–५ मनकामनामा बाँध बाधेर विदुर नगरपालिका–७ तुप्चे (बेत्रावती)मा विद्युत उत्पादन गृह रहने आयोजना पूरा गर्न रु पाँच अर्ब १२ करोड लाग्ने कम्पनीले जनाएको छ ।
आयोजनाको तर्फबाट प्रबद्धक कम्पनीको ३० प्रतिशत लगानी रहने छ भने बाँकी लगानीको लागी बित्तिय व्यवस्थापनको प्रक्रियामा रहेको छ ।


तोकिएको समयमा आयोजना सम्पन्न गरी उत्पादित विद्युत प्राधिकरणको राष्ट्रिय प्रशारण लाइनमा जोडिएपछि सरकारको राष्ट्रिय प्राथमिकतामा राखिएको जलविद्युत आयोजना निर्माण गर्ने उद्देश्यमा योगदान पुग्नुका साथै देशको ऊर्जा संकटलाई समेत कम गराउन सहयोग पुग्ने विस्वास लिइएको कम्पनीले जनाएको छ ।