नुवाकोट त्रिशूली महोत्सव सुरु

Posted on: December 18, 2018 | views: 1063

नुवाकोट । ‘नुवाकोट त्रिशूली महोत्सव’ सुरु भएको छ । नुवाकोट, रसुवा र धादिङकै पहिलो विद्यालय त्रिभुवन त्रिशूली माध्यमिक विद्यालयमा सिभिल इञ्जिनीयरिङ कक्षा सञ्चालनका लागि आर्थिक संकलनको उद्देष्यले आयोजना गरेको महोत्सवको सोमबार प्रतिनिधिसभा सदस्य नारायणप्रसाद खतिवडाले उद्घाटन गरेका हुन् ।


‘विविध संस्कृतिक मनोरञ्जनात्मक सस्तो बजार, शिक्षा, कृषि, पर्यटन तथा व्यापार महोत्सव’ भने नाराका साथ सुरु भएको महोत्सव मार्फत जिल्लाको आर्थिक, सांस्कृतिक, पर्यटन र ऐतिहासिक पहिचानलाई थप विस्तार गर्न मद्दत पुग्ने समेत विश्वास लिएको खतिवडाले बताए ।
नुवाकोटको त्रिशूली बजार नजिकै पर्ने विद्यालयमा आयोजित महोत्सव मार्फत संकलन भएको रकमले इञ्जिनीयरिङ विषयको पठनपाठनमा खर्च गर्ने विद्यालय व्यवस्थापन समतिका अध्यक्ष नवीन्द्रमान प्रधानले बताए ।


महोत्सवमा करीब दुई सय स्टल राखिएका छन् भने पचास हजार दर्शकले मेलाको अवलोकन गर्ने लक्ष्य लिइएको छ । विद्यालयमा यस शैक्षिक सत्रदेखि सुरु भएको प्राविधिक शिक्षा तथा व्यावसायिक तालीम परिषद् (सिटिइभिटी) अन्तर्गतको तीनवर्षे डिप्लोमा इन सिभिल इञ्जिनीयरिङ विषयको अध्ययन गराउन आर्थिक अभाव भएकाले महोत्सव मार्फत करीब दश लाख रुपैयाँ संकलन हुने अपेक्षा लिइएको प्रधानले बताए ।


हाल विद्यालयमा ४८ जना विद्यार्थी सिभिल इञ्जिनीयरिङ विषयमा अध्ययनरत छन् । सेमेष्टरका लागि नेपाल सरकारले तोकेको प्रतिविद्यार्थी दुई लाख रुपैयाँ मात्र शुल्क लिने र अपुग रकमका लागि महोत्सव आयोजना गर्नुपरेको विद्यालयका प्रअ महेन्द रावतले बताए ।


विसं २००७ मा स्थापित विद्यालयमा हाल स्नाकोत्तरतहसम्मको अध्ययन हुदै आएको छ भने जिल्लामा एक मात्र दश जोड दुईसम्म छात्राबास सहितको विज्ञान विषय समेत अध्यापन हुने गरेको छ ।


महोत्सव मार्फत लोपोन्मुख कला, लोक सँस्कृति र परम्परालाई जीवन्त, संरक्षण र सम्बद्र्धन गर्नुका साथै जिल्लामा उत्पादित कृषि एंव स्थानीय उपजको उचित बजार मुल्यका साथ जिल्लाको समष्टि व्यापारमा सघाउ पु¥याउने लक्ष्य राखिएको आयोजकले जनाएको छ ।


महोत्सवमा प्राकृतिक, धार्मिक सांस्कृतिक र ऐतिहासिक सम्पदा एंव धरोहरको आन्तरिक र बाह्य बजारमा प्रचारप्रसार गरी जिल्लाको विकासको साथै जनताको जिवनस्तरमा समेत सुधार गर्न टेवा पु-याउने सामाग्रि विक्री एंव प्रदर्शनीमा राखिएको छन् ।


महोत्सव सञ्चालन सचिवालय प्रमुख ज्ञानेन्द्र श्रेष्ठका अनुसार महोत्सवमा दैनिक प्रयोजनको लागी आवश्यक चामल, चिउरा, मसला लगायतका खाद्यान्न सामाग्रि, ट्राउट माछा, लत्ताकपडा, भन्सामा प्रयोग हुने भाडा लगायतको सामानमा छुट सहितको शुल्कमा उपलब्ध गराइएको छ ।


यस्तै, विद्युतीय सामाग्रि, मनोरञ्जन गतिविधि, पिङ, धार्मिकस्थलको भ्रमण लगायतको बन्दोबस्ती समेत मिलाइएको छ । महोत्सवमा ‘नुन देखी सुनसम्म’ र ‘जिरा देखी हिरासम्म’ एकै स्थानमा पाईने नारा सहित दैनिक उपभोग्य सामाग्र्रि सबै उपलब्ध रहेको आयोजकले जनाएको छ । कृषि उब्जनी, हस्तकलाका सामाग्रि लगायतको लागी निःशुल्क स्टलको समेत व्यवस्था मिलाइएको छ । महोत्सवमा स्थानीय मौलिक कला, संस्कृति र ऐतिहासिक महत्व झल्काउने वस्तु र प्रस्तुति आकर्षणका रुपमा रहेका छन् ।


सोमबारदेखि सुरु भएको महोत्सव यही पुस १० गतेसम्म चल्ने आयोजकले जनाएको छ ।