कविलासको नाट्यश्वरी क्रसर चल्न अदालतले दियो अनुमति (आदेश सहित)

Posted on: November 12, 2018 | views: 432

नुवाकोट । पञ्चकन्या गाँउपालिका वडा नं. २ कविलासमा रहेको नाट्यश्वरी रोडा ढुङ्गा उद्योग सञ्चालनमा रोक नलगाउन उच्च अदालत पाटनले अन्तरिम आदेश जारी गरेको छ । अदालतको आदेशसगै लामो समयदेखि बन्द रहेको क्रसर उद्योग सञ्चालनको लागी कानूनी मान्यता पाएको छ ।


उच्च अदालतका न्यायाधीशहरु मोहम्मद साविर हुसैन र विष्णुप्रसाद कोइरालाको संयुुक्त इजलासले आइतबार भूकम्पपीडितको आवास पुनःनिर्माणमा समेत असर परेको भन्दै उद्योग सञ्चालनमा रोक नलगाउनको लागी जिल्ला प्रशासन कार्यालय, नुवाकोटको नाममा अन्तरिम आदेश जारी गरेको हो ।


    आदेशमा खानी सञ्चालन तत्काल रोक लगाउँदा भूकम्पपीडित समेतलाई नकारात्मक असर पर्नसक्ने देखिएकाले मुद्दाको अन्तिम किनारा नलाग्दासम्म नाट्यश्वरी रोडा ढुङ्गा उद्योग सञ्चालनमा रोक नलगाउनुको लागी नुवाकोट प्रशासनको नाममा आदेश दिएको हो ।


    अधिवक्ता हुतराज कोइरालाले उद्योग सञ्चालनमा रोक लगाउँदा भूकम्पपीडितको आवास निर्माणमा कठिनाइ हुने उल्लेख गर्दै उद्योग सञ्चालनमा रोक लगाउने जिल्ला प्रशासन कार्यालय नुवाकोटको निर्णय रोक्न अन्तरिम आदेशको माग गरे अनुसार सयुक्त इजलाशले उद्योग चलाउनको लागी आदेश दिएको हो ।


आदेशमा इजाजत लिएर सञ्चालनमा आएको उद्योगले नुवाकोटको लिखु, पचकन्या र शिवपुरी गाउँपालिकामा भित्र पर्ने भूकम्पपीडितलाई आवास निर्माणको लागी सहुलियत दरमा रोडा, ढुङ्गा र बालुवा दिने उद्देश्य भएकाले उद्योग चलाउन रोक लगाउदा त्यसको असर पुर्ननिर्माणमा पर्ने भएकाले अदालतमा विचारधीन रहेको मुद्धाको अन्तिम किनारा नलागेसम्म निर्बाध रुपमा चलाउनको लागी रोक नलगाउन प्रशासन कार्यालयलाई आदेश दिएको छ ।


नुवाकोटमा नौ वटा क्रसर उद्योग रहेकोमा तोकिएको मापदण्ड पूरा नगरेको भन्दै जिला अनुगमन समितिको स्थलगत अनुगमनको प्रतिवेदनको आधारमा बाँकीलाई सर्वोच्च अदालतको आदेशमा चलाउनको लागी रोक लगाइएको छ ।
क्रसर उद्योग बन्द भएसगै नदी र खोलाबाट उत्खनन् भएका निर्माजन्य सामागि बालुवा, रोडा ढुङ्गा, गिट्टी लगायतको मूल्य अकासिएको छ भने पुर्ननिर्माण, विकास निर्माण एवम् पूवर्धाधार निर्माणका काममा समेत प्रत्यक्ष असर पुग्दै आएको छ ।