त्रिशूली–काठमाडौँ २२० केभी प्रशारण लाइनको तार विस्तारको काम सुरु

Posted on: October 24, 2018 | views: 511

७ कार्तिक, नुवाकोट । निर्माणाधीन त्रिशूली–काठमाडौँ २२० केभी ‘डबल’ सर्किट प्रसारण लाइनमा विद्युतीय तार विस्तारको काम आजदेखि सुरु गर्न लागिएको छ । त्यसको लागी नुवाकोटको सूर्यमतीदेखि थानसिंहसम्म पर्ने १७ वटा खम्बामा कामगर्न लागिएको माथिल्लो त्रिशूली थ्री ‘ए’ जलविद्युत आयोजनाका प्रमुख फणिन्द्रराज जोशीले जानकारी दिनुभयो ।


उहाँको अनुसार पहिलो चरणमा विद्युतीय तार विस्तारको काम सूर्यमतीबाट चतुरालेहुदै थानसिंहसम्मको खम्बा नं. २४.१ देखि २९ नं. सम्म तार विस्तार गर्न प्राविधिकहरु ठेकेदार कम्पनी चाइना इन्टरनेशनल वाटर एण्ड इलेक्ट्रिक कर्पोरेशन (सिडब्लुई)ले कार्यक्षेत्रमा पठाएको छ ।
नुवाकोट र रसुवामा उत्पादित विद्युत केन्द्रीय प्रसारण लाइनमा जोड्न विसं २०६८ फागुन १४ गतेदेखि निर्माण शुरु भएको २२० केभी प्रसारण लाईनमा खम्बा गाड्ने काम अन्तिम चरणमा पुगेपछि विद्युतीय तार जडान गर्न लागिएको हो ।


२२० केभीको ‘डबल’ सर्किट प्रसारण लाइनमा पर्ने १४० वटा खम्बामध्ये अधिकांशको निर्माण भइसकेका छन् । बाँकी केहीको फाउण्डेशन तयार भइसकेकाले टावर ठड्याउन मात्र बाँकी रहेको निर्माणको समन्वयन र ब्यवस्थापनको जिम्मेवारी पाएको थ्री ‘ए’ आयोजनाका उपप्रबन्धक सत्यराम ज्याख्वाले जानकारी दिनुभयो ।


उहाँको अनुसार प्रशारण लाइनमा मुख्य जटिल र कठिनाई मानिने खम्बा निर्माणको काम पूरा भएकाले अब विद्युतीय प्रशारण लाइन विस्तारलाई तिव्रता दिन लागिएको छ ।
“प्रशारण लाइन निर्माणमा स्थानीयबासीको अबरोध, मुआब्जा निर्धारणमा ढिलाई र सामुदायिक वनक्षेत्र उपभोग गर्न उत्पन्न कठिनाईका समस्याका समाधान भएसँगै तोकिएको मितिमा प्रशारण लाइन पूरा हुने निश्चित बनेको छ ।” ज्याख्वाले भन्नुभयो “त्रिशूली थ्री ‘ए’ जलविद्युत आयोजनाबाट उत्पादन भएको विद्युत केन्द्रीय प्रशारण लाइनमा जोड्नको लागी विद्युत प्रशारण लाइन निर्माणको काम तोकिएको समयमा पूरा गर्नुपर्ने बाध्यता भएकाले ठेकेदारलाई काम छिटो गर्न दबाब दिइरहेका छौ ।”


प्रशारण लाइन निर्माणको काम अगामी पुस १५ गतेभित्र सक्नुपर्ने जिम्मेवारी ठेकेदारलाई कम्पनी सिडब्लुईलाई दिइएको छ । उक्त मितिमा काम सम्पन्न गर्न सक्नेगरी निर्माणको हालको प्रगति सन्तोषजनक छ ।
माथिल्लो त्रिशूली थ्री ‘ए’ आयोजनाबाट सन् २०१९ फेब्रुअरी ९ तारिख ( विसं २०७५ माघ २६) मा पहिलो युनिटबाट ३० मेगावाट विद्युत उत्पादनको योजना बनाइएकाले सो अवधि अगावै त्रिशूली–काठमाडौँ प्रशारण लाइन पूरा गर्नुपर्ने बाध्यकारी अबस्था छ ।


नुवाकोट र रसुवामा उत्पादित करीब ९०० मेगावाट विद्युत त्रिशूली–काठमाडौँ प्रशारण लाइनको एकै ‘हब’ मार्फत केन्द्रीय प्रसारण लाइनसम्म जोड्न ४५ किमि प्रसारण लाइन निर्माण कार्यलाई महत्वको रुपमा लिइएको छ ।
प्रशारण लाइन निर्माणमा यही आयोजना अन्तरगत नेपालमा पहिलो पटक काठमाडौको मातातिर्थदेखि केन्द्रीय प्रशारण लाइनको स्टेशनसम्म एक किमि दुरीको विद्युतीय तार विस्तारको काम भूमिगत (अन्डरग्राउण्ड)  रुपमा बिछ्याउन लागिएको छ ।


प्रसारण लाइनमार्फत नुवाकोट र रसुवाका दुई जिल्मा निर्माणाधीन रसुवागढी, साञ्जेन, तल्लो साञ्जेन, त्रिशूली–१, त्रिशूली थ्री ‘ए’, थ्री ‘बी’, मध्ये त्रिशूली गंगा, गल्छी–त्रिशूलीसहित सानाठूला गरी तीन दर्जन भन्दाबढी आयोजनाबाट उत्पादन हुने विद्युत केन्द्रीय प्रसारण लाइनमा जडान गरिने नेपाल विद्युत प्राधिकरणको योजना छ ।
उक्त प्रशारण लाइन निर्माणको लागी रु दुई अर्ब ५० करोड लाग्ने प्रारम्भिक अनुमान छ ।

पाँच दिन विद्युत अबरुद्ध हुने :

आजदेखि सुरु गर्न लागिएको त्रिशूली–काठमाडौँ २२० केभी प्रशारण लाइनको विद्युतीय तार विस्तारको काम सहज बनाउन नुवाकोटको विभिन्न स्थानमा पाँचदिन दिनभर विद्युत कटौती हुने भएको छ । नेपाल विद्युत प्राधिकरण नुवाकोट वितरण शाखाको अनुसार त्रिशूली–काठमाडौँ प्रशारण लाइनको विद्युतीय तार विस्तारको कार्य सञ्चालन अवधि आजदेखि आगामी आइतबारसम्म प्रत्येक दिन बिहान ८ बजेदेखि साँझ ५ बजेसम्म विद्युत सेवा पूर्ण रुपमा बन्द गर्न लागिएको हो ।


वितरण शाखाले जारी गरेको सूचना अनुसार देवीघाट जलविद्युत केन्द्र मार्फत वितरणहुदै आएको फिडर नं. ३ अन्तरगत पर्ने विदुर नगरपालिका वडा नं. २ शेरादेखि चतुराले, मदानपुर, ककनीहुदै ओखरपौवासम्मका एक हजार भन्दा बढी ग्राहकले उपभोग गर्ने विद्युत सेवा पाच दिन दैनिक नौ घण्टा बन्द हुनेछ ।