विद्युत् प्राधिकरण र थ्री गर्जेजबीच द्विपक्षीय सम्झौता

Posted on: November 16, 2017 | views: 231

काठमाडौं । नेपाल विद्युत् प्राधिकरण र चीनको थ्री गर्जेज कम्पनीबीच पश्चिम सेती जलविद्युत् आयोजनामा संयुक्त लगानी गर्ने विषयको द्विपक्षीय सम्झौतामा हस्ताक्षर भएको छ । 


प्राधिकरणका कार्यकारी निर्देशक कुलमान घिसिङ र थ्री गर्जेजका प्रतिनिधिले बिहिबार सम्झौतापत्रमा हस्ताक्षर गर्नुभयो । 


प्रारम्भिक सम्झौता भएको १० महिनापछि संयुक्त लगानी गर्ने र संयुक्त कम्पनी स्थापना गर्ने विषयमा समझदारी भएको प्राधिकरणका प्रवक्ता प्रबल अधिकारीले जानकारी दिनुभयो । 


गत माघ ३ गते यसबारे प्रारम्भिक सम्झौता भएको थियो । सम्झौताअनुसार आयोजनामा कुल ७५ प्रतिशत चिनियाँ कम्पनी र २५ प्रतिशत प्राधिकरणको लगानी रहनेछ । 


विसं २०६८ मा उक्त कम्पनीसँग पश्चिम सेती निर्माणसम्बन्धी सम्झौता भएको थियो । कम्पनीको प्राविधिक टोलीले आयोजना स्थलको भौगर्भिक अध्ययन गरिसकेको छ । 


लगानी बोर्डका प्रमुख कार्यकारी अधिकृत महाप्रसाद अधिकारीले आयोजना अगाडि बढाउने सम्बन्धमा प्राधिकरण र चिनियाँ पक्षबीच भएको सम्झौता दीर्घकालीन महत्वको भएको बताउनुुभयो । 


पश्चिम सेती जलविद्युत आयोजनाको लागत करिब १ खर्ब ६० अर्ब हुने बताइएको छ ।