जाजरकोटका स्थानीयतहमा बैंक नहुँदा स्थानीय समस्यामा

Posted on: November 09, 2017 | views: 97

जाजरकोट ।

जाजरकोट जिल्लाका ७ स्थानीय तहमध्ये ६ स्थानीयतहमा बैंक तथा वित्तीय संस्था नहुँदा आर्थिक कारोबार गर्न कठिनाइ भएको छ ।

 जिल्लामा कायम रहेका ७ मध्ये त्रिवेणी नलगाड नगरपालिका, छेडागाड नगरपालिका, शिबालय गाउँपालिका, जुनीचाँदे गाउँपालिका, कुशे गाउँपालिका र बारेकोट गाउँपालिका स्थानीय तहमा बैंक स्थापना नहुँदा सर्वसाधारण, शिक्षक, स्थानीयतहका कर्मचारी र जनप्रतिनिधि लगाएत मर्कामा परेका छन् । 

    सरकारले सबै स्थानीयतहमा एउटा वाणिज्य बैंक स्थापना गर्ने प्रतिबद्धता जनाएको भए पनि त्यसको कार्यान्वयन हुन नसक्दा आर्थिक तथा वित्तीय कारोबार गर्नको लागि जिल्लाको सदरमुकाम धाउनु पर्ने समस्या रहेको कुशे गाउँपालिकाका अध्यक्ष हरिचन्द्र बस्नेतले जानकारी दिनु भएको छ ।

भौगोलिक विकट्ताका कारण सिंहदरबारको अधिकार गाउँगाउँमा भन्ने सरकारी नारा, नारामै सिमित भएको अध्यक्ष बस्नेतको भनाइ छ । 

  जाजरकोटको ७ स्थानीय तहमध्य सदरमुकाम स्थित भेरी नगरपालिकामा मात्र बैंकको सुविधा उपलब्ध छ । बैंकको काम लिएर दुर्गमका स्थानीयवासी २÷३ दिनको बाटो हिँडेर सदरमुकाम खलंगा धाउन बाध्य भएका छन् ।

जिल्लामा रहेका निजी क्षेत्रका अधिकांश बैंक सदरमुकाममा केन्द्रित भएका छन् । सस्तो ब्याजदरमा निक्षेप संकलन गरी महङ्गो ब्याजदरमा कर्जा प्रवाह गरी सेवा प्रवाह भन्दा नाफामुखी कार्य गर्ने गरेका छन् ।