मध्यपश्चिमका ८० प्रतिशत खेतीयोग्य जमिन सिँचाइविहीन

Posted on: November 09, 2017 | views: 95

सुर्खेत ।

मध्यपश्चिममा साढे चार लाख हेक्टर भन्दा बढी खेतीयोग्य जमिन अझैं सिँचाइविहीन छन् । कूल खेतीयोग्य जमिनमध्ये ८० प्रतिशत जमिन सिँचाइ सुविधाबाट वञ्चित भएको पाइएको छ ।

मध्यपश्चिमाञ्चल क्षेत्रीय कृषि निर्देशनालयको तथ्यांक अनुसार यस क्षेत्रमा पाँच लाख ८५ हजार दुई सय ३९ हेक्टर जमिन खेतीका लागि योग्य छ ।

तर त्यसमध्ये चार लाख ६६ हजार नौ सय ३७ हेक्टर जमिनमा भने अझै पनि सिँचाइ पुग्नसकेको छैन ।

जसले गर्दा खेतीयोग्य जमिनमध्ये एक लाख ३५ हजार सात सय ७० हेक्टर जमिनमा खेती नै हुनसकेको छैन भने खेती गरिएको जमिनमा पनि सिँचाइ अभावले लगानी अनुसारको उत्पादन लिन नसकिएको बताईएकोे छ ।

कूल खेती योग्य जमिनमध्ये हाल चार लाख ४९ हजार चार सय ६९ हेक्टर जमिनमा मात्र खेती गरिएको छ ।

सिँचाइ अभाव भएका ठाउँमा खेतीका लागि आकाशे पानीको भर पर्नुपर्ने अवस्था रहेको छ ।