निगम प्रमुख खड्काले मनोमानी अनुमति दिएको भन्दै ट्यांकर व्यवसायीद्वारा इन्धन ढुवानी ठप्प पार्ने चेताव

Posted on: October 29, 2017 | views: 141

१२ कात्तिक, काठमाडौं ।

नेपाल आयल निगमका विवादास्पद कार्यकारी निर्देशक गोपालबहादुर खड्काले मनोमानीगरि नयाँ ट्यांकर सञ्चालनको अनुमति दिएको आरोप लगाउँदै व्यवसायीले पेट्रोलियम ढुवानी ठप्प पार्ने चेतावनी दिएका छन् ।


नेपाल पेट्रोलियम ढुवानी व्यवसायी महासंघले आइतबार आपूर्ति मन्त्रालय र निगमलाई मागपत्र पेश गर्दै निर्णय खारेज नभए १५ मंसिरदेखि ढुवानी ठप्प पार्ने बताएका हुन् ।


निगमले ८ पुस ०७३ मा नयाँ पेट्रोलियम ढुवानी नियमावली जारी गरेको थियो । जेठ ०७४ सम्ममा करिब दुई सय वटा नयाँ ट्यांकरले अनुमति दिएको सूचना आफूहरुलाई प्राप्त भएको महासंघका कार्यवाहक अध्यक्ष गुणराज निरौलाले बताए । निगमबाट स्वीकृति पाएर कतिपय ट्यांकर सञ्चालनमा समेत रहेको महासंघको दाबी छ ।


खारेज गरिएका ट्यांकरसमेत सञ्चालनमा आएकाले तिनको तथा नयाँ स्वीकृति पनि खारेज गरिनुपर्ने महासंघको माग छ ।


हाल नेपालमा १८ सय ट्यांकरमार्फत् इन्धन ढुवानी हुँदै आएको छ ।


यसअघि सोही विषयलाई लिएर अख्तियारमा पनि उजुरी परेको थियो । आयोगले नियमावली बनाएर कानुनसम्मत अनुमति दिन निगमलाई निर्देशन दिएको थियो ।


नयाँ ट्यांकरको सञ्चालन अनुमति दिँदा सार्वजनिक सूचना जारी गरेर आवश्यकताका आधारमा मात्र स्वीकृति दिन अख्तियारले निगमलाई निर्देशन दिएको थियो ।


निगम आफैंले बनाएको नियमावली कुल्चेर अनुमति दिएको आरोप महासंघको छ ।