नेपालगञ्ज भन्सारले भारतीय ट्रकनै अवैध रुपमा छिर्दा समेत देखेन

Posted on: October 29, 2017 | views: 150

नेपालगन्ज ।

भन्सारबाट केही सामान लुकाएर छिर्नु त नेपाली सिमा क्षेत्रका भन्सार देखी बिमानस्थलका भन्सारका घटना समेत सामान्य हुन थालिसके । तर नेपालगञ्ज भन्सारले भने करिव एक करोड रुपैयाँ बराबरको सामान सहित ट्रकनै छिर्दा समेत पत्तो नपाएको खवर सार्वजनिक हुन पुगेको छ ।


विभिन्न सुरक्षा घेरालाई चुनौती दिदै नेपालगन्ज भन्सारले सुईकोसम्म नपाई सिंगो ट्रक नै नेपालगन्ज भित्रेपछि संघीय प्रहरी इकाई कार्यालय नेपालगन्जबाट खटेको प्रहरीको विषेश टोलीले नियन्त्रणमा लिएपछि घटना सार्वजनिक भएको हो ।


विना भन्सार ट्रक नेपालगन्ज प्रवेश गरेको गाडिमा ७० लाख बढी रुपैयाँको मेसिन र त्यसका पार्टस भित्रिंदै गर्दा प्रहरीले शनिवार राति करीब ११ः३० बजेको समयमा यूपी ३६ टी ७३०७ नं।को भारतीय ट्रकलाई नियन्त्रणमा लिएर अनुसंधान अघि बढाएको छ ।


प्रहरीले बरामद गरेको सो ट्रकको सामान कसको र कति रकम बराबरको भन्ने विषयमा अझै अनुसन्धान भइरहेकोले बताउन कठिन भएको संघीय प्रहरी इकाई कार्यालय नेपालगन्जका प्रहरी प्रमुख एसएसपी महेशविक्रम शाहले जानकारी दिए ।


सीमा क्षेत्रबाट महेन्द्र बहुमुखी क्यम्पससम्म नेपाल प्रहरी, सशस्त्र प्रहरीका विभिन्न चेकजाँचको पोष्टहरु छन् तर, कसरी विना भन्सार सिंगो ट्रक नै यहाँसम्म पुग्यो चिन्ताको विषय बनेको छ ।


नेपालगन्ज भन्सार कार्यालय प्रमुख जनार्दन आचार्यले रातीको समयमा भएकोले आफू घटनाको छानविन गरिरहेको मौखिक जवाफ दिएर पन्छिए ।