मकै थन्काउने गोदामघर वनाइँदै

Posted on: October 16, 2017 | views: 190

पर्वत ।

मकै जोन कार्यक्रम सञ्चालन भएको पर्वतको फलेवासमा मकै थन्काउने गोदामघर निर्माण भैरहेको छ । उक्त गोदामघर निर्माणको काम अहिले चलिरहेको छ । फलेवास नगरपालिका ५ खानीगाउँमा निर्माधिन गोदामघरमा २५ टन मकै थन्काउन सकिने जनाइएको छ ।  

प्रधानमन्त्री कृषि आधुनिककरण परियोजना मकै जोन कार्यान्वयन कार्यालय फलेवासले गोदामघर निर्माणको कार्य गरिरहेको हो । साविकका गाविस खानीगाउँ मुडिकुवा, शंकरपोखरी ,थापाठाना ,लिमिठाना र ठानामौलामा उत्पादन हुने मकै वीउको थन्काउन गोदामघर वनाइँदै गरेको वरिष्ठ कृषि विकास अधिकृत वसन्तकुमार श्रेष्ठले जानकारी दिनुभयो । यि ६ गाविस मकै जोनमा समाबेश भएका छन् । ति गाविसमा सुचिकृत भएको ५८६ हेक्टर क्षेत्रफलमा मकै खेती गरिन्छ । कृषकहरुले उत्पादन गर्ने मकैको वीउ जोनले खरिद गरेर वजारीकरण गर्ने श्रेष्ठले वताउनुभयो । ‘कृषकले उत्पादन गर्ने मकैको वीउ यहाँ थन्काएर राख्ने र वजारीकरण गर्ने लक्ष्य हो’ श्रेष्ठले भन्नुभयो । 

गत आर्थिक वर्षवाट निर्माण थालिएको गोदामघर निर्माणका लागि अहिलेसम्म २३ लाख रुपैयाँ खर्च भैसकेको छ । करिव ५० प्रतिशत काम सकिएको निर्माण कार्य चालु वर्षको अन्तिमसम्म सक्ने लक्ष्य रहेको छ । यो वर्ष पनि वजेट स्विकृत भएर आईसकेको छ वरिष्ठ कृषि विकास अधिकृत श्रेष्ठले भन्नुभयोे,‘ यो वर्ष सबै काम पुरा गर्नुपर्ने दवावमा छौँ । ’गोदामघरमा वीउका लागि छुट्टै र अन्य प्रयोजनका लागि चाहिने मकै भण्डारण गर्ने छुट्टै गोदामघर हुने उहाँले वताउनुभयो । 

गतवर्ष देखि मकै जोन कार्यक्रम सञ्चालन भएपछि समुह र सहकारी गठन गरेर कृषकहरुले मकै उत्पादन गरिरहेका छन् । यो वर्ष झकलक कृषि सहकारीले १५ टन मकैको वीउ उत्पादन गरेको छ भने अम्वोट कृषक समुहले ५ टन र लिमिठाना वीउ उत्पादक समुह ३ टन उत्पादन गरेको छ । 

भण्डारण गर्ने गोदामघर निर्माण भईनसकेकाले यो वर्षको वीउ भने सिधै वजार मुल्यको आधारमा विक्री गर्ने योजनामा रहेको कृषि अधिकृत हेम शर्मा तिवारीले जानकारी दिनुभयो । ‘कृषकहरुले वीउ विक्री गर्दिनुप¥यो भनेर भनेका छन्, तिवारीले भन्नुभयो,‘हामीले केहि फर्म र कम्पनीलाई खबर गरेका छौँ केहि दिनमै उनीहरु यहाँ आएर लैजाने कुरो छ ।’