तिहार नजिकिएसँगै फूलको व्यापार बढ्यो, जापान, अमेरिका देखी खाडीदेशमा निर्यात

Posted on: October 13, 2017 | views: 258

काठमाडौं । तिहार नजिकिदै गएपछि देशभर फूलको कारोबार बढेको छ । तिहारको कारण फूलको कारोबार र माग बढेको व्यवसायीहरुले बताएका छन् ।


गत वर्षको तुलनामा यस वर्ष पुलको माग बढेका कारण फूलको मूल्यमा १० प्रतिशतसम्म वृद्धि हुने अनुमान गरिएको छ । गत वर्ष तिहारमा ११ लाख मालाको माग भएकामा यस वर्ष १५ लाख सयपत्री मालाको माग रहेको छ । 


यस वर्ष उपभोक्ताले एउटा मालाको ६० देखि रु ७० सम्म तिर्नु पर्ने देखिन्छ । गत वर्ष  ५० देखि रु ६० सम्ममा माला किनमेल भएको फ्लोरी कल्चर एशोसिएसनले जनाएको छ । 


यस वर्ष फूलको उत्पादनमा कम भएकाले तिहारका लागि ३ लाख माला आयात गर्नु परेको फ्लोरिकल्चर एशोसिएसनका अध्यक्ष कुमार कसजु श्रेष्ठले जानकारी दिनुभयो । 


अहिले देशभित्रै ९० प्रतिशत फूल उत्पादन हुन थालेकाले १० प्रतिशत मात्र भारतबाट ल्याउनुपर्ने बाध्यता छ । यसअघिका तिहारमा १८ प्रतिशतसम्म फूल भारतबाट आयात गर्नुपर्ने अवस्था थियो । 


जापान, कोरिया, अमेरिका, बेलायत देखी अस्टे«लिया, मलेसिया लगायतका देशमा नेपालीको बसोबास रहेकाले तिहारको समयमा ती देशमा मखमली फूल निर्यातसमेत हुन थालेको छ । 


नेपालमा व्यावसायिक रूपमा ४०० प्रजातिका फूल मात्र उत्पादन हुँदै आएको छ । यस व्यवसायबाट ४१ हजारभन्दा बढी व्यक्तिले प्रत्यक्ष वा अप्रत्यक्ष रूपमा लाभ लिएका छन् । नेपालमा लगभग १४७ हेक्टर क्षेत्रफलमा ६०० प्रजातिका फूल रोप्ने गरिन्छ ।