तीन सयभन्दा बढी सवारी साधन केरुङ प्रस्थान

Posted on: October 08, 2017 | views: 272

रसुवा ।

नेपालको उत्तरी नाका रसुवागढीबाट चिनियाँ सामान आयातका लागि ट्रक कन्टेनर धमाधम केरुङ जान थालेका छन् । 


बडादशैँयता ३६८ वटा ट्रक कन्टेनर केरुङका लागि प्रस्थान गरिसकेको र १०५ वटा ट्रक कन्टेनर भने मितेरी पुलबाट केरुङ जाने प्रक्रियामा रहेको सशस्त्र प्रहरी सीमा सुरक्षा गुल्मका प्रहरी नायब उपरीक्षक प्रकाश वाग्लेले बताउनुभयो ।


साँघुरो सडक भएका कारण केरुङतर्फ जाने मालबाहक ट्रक कन्टेनर लामबद्ध भई सडकमा पालो कुरिरहेको प्रहरीले जनाएको छ । 


चीनबाट स्याउ, तयारी कपडा, बच्चाका खेलौना, विद्युतीय सामान, कपडा, जुत्ता, चप्पल, थर्मस, खाना पकाउने कुकरलगायतका सामग्री आयात हुने गरेको टिमुरेस्थित भन्सार कार्यालयले जनाएको छ ।