नेपालमै उत्पादित धागो र कपडा मेला काठमाडौँमा शुरु

Posted on: September 15, 2017 | views: 248

काठमाडौं ।

नेपालमै उत्पादित धागो र कपडाको मेला काठमाडौँमा शुक्रबारबाट शुरु भएको छ । 


नेपाल धागो उद्योग संघले भुकुटीमण्डपमा आयोजना गरेको मेलामा नेपालमै उत्पादन भएका विभिन्न दैनिक प्रयोग हुने लुगा, तन्ना लगायतका उत्पादनहरु राखिएको छ ।


मेलाको उद्घाटन गर्दै उद्योग मन्त्रालयका सचिव शंकरप्रसाद कोइरालाले कपडा उद्योग हरेक देशको मातृ उद्योग भएको बताउनुभयो । उहाँले नेपाली उद्योगको विकासका लागि मन्त्रालयले सबै खाले सहकार्य गर्ने बताउँदै पुराना उद्योगका कानून संशोधन गर्दै लैजाने बताउनुभयो ।


नेपाल उद्योग वाणिज्य महासंघका वरिष्ठ उपाध्यक्ष शेखर गोल्छाले सरकारले देशमा सञ्चालित उद्योगलाई प्रवद्र्धन गर्नेभन्दा पनि राजश्व संकलन गर्नेतिर मात्र केन्द्रित रहेको उल्लेख गर्नुभयो । 


नेपाल उद्योग परिसंघका अध्यक्ष हरिभक्त शर्मा, नेपाल कपडा उद्योग संघका अध्यक्ष शैलेन्द्र प्रधान र समुद्रपार निर्यात पैठारी संघका अध्यक्ष हिमबहादुर रावलले नेपाली उत्पादन प्रयोग गर्न सरकारले नै जनतालाई प्रेरित गर्नुपर्नेमा जोड दिनुभयो । 


नेपाल धागो उत्पादन संघका अध्यक्ष पवन गोल्याणले तीन दशक अघिबाट नेपालमा आधुनिक कपडा उद्योग शुरु भएको उल्लेख गर्दै करिब १० अर्ब लगानी रहेका ६ वटा ठूला धागो उद्योगमा लगानी रहेको जानकारी दिनुभयो ।


अहिले ४ उद्योगमा मात्र ५० हजारभन्दा बढीले रोजगारी पाएको जनाइएको छ । मेलामा विभिन्न कपडा, सुर्टिङसर्टिङ, होजियारी, स्वेटरलगायत उत्पादन गर्ने विभिन्न उद्योगका ५५ कक्ष राखिएको छ ।