दशैंमा काठमाडौंलाई च्याङ्ग्रा मुस्ताङबाट ल्याइने

Posted on: September 10, 2017 | views: 210

काठमाडौं ।

खाद्य संस्थानले दशैँलाई लक्षित गरी यसपाली मुस्ताङबाट च्याङ्ग्रा किन्ने  भएको छ । केरुङबाट आयात गर्दा ढुवानी लागत बढ्ने भएकाले मुस्ताङबाट किन्न लागेको खाद्य संस्थानले जनाएको छ ।


यसपाली असोज ५ देखि ६ गतेसम्म च्याङ्ग्रा राजधानी भित्रिसक्ने संस्थानका प्रवक्ता शङ्कर सापकोटाले बताउनुभयो । 


च्याङ्ग्रा किन्नका लागि संस्थानले मुस्ताङको सदरमुकाम जोमसोममा खरिद केन्द्र स्थापना गरेको छ । 


संस्थानले किसान वा व्यवसायीसँग च्याङ्ग्रा किनेर हिँडाएर म्याग्दीको सदरमुकाम बेनीसम्म ल्याउने र बेनीबाट ट्रकमा राखी असोज ५ देखि ६ गतेभित्र राजधानी ल्याइसक्ने तयारी गरेको छ । 


गत वर्ष संस्थानले एक हजार ४०० च्याङ्ग्रा र एक हजार ४००  खसी–बोका गरी दुई हजार ८०० च्याङ्ग्रा तथा खसी–बोका किनेकोमा यसपाली भने एक हजार च्याङ्ग्रा र एक हजार ५०० खसी–बोका किन्ने निणर्य गरेको हो ।