उत्तरी गोरखाका नागरिक स्याउ बेचेर नून तेलको जोहो गर्दै

Posted on: September 09, 2017 | views: 69

गोरखा ।

उत्तरी गोरखाको चुमनुब्री गाउँपालिकाका बिभिन्न स्याउ पकेट क्षेत्रका स्थानीय बासिन्दाहरु स्याउ टिपेर बिक्री गर्न ब्यस्त छन् । सिर्दिवास, बिही, ल्हो गाउँमा उत्पादन भएको स्याउ तिब्बतको रुइला नाका हुँदै कुम्दाङ बजारमा लगेर बिक्री गरिएको जानकारी बिहीका स्थानीय बासिन्दा जीवन गुरुङले दिनुभयो । 

गुरुङले भन्नुभयो, ‘बारीमा लठरम्म फलेका स्याउ टिप्न किसानहरु ब्यस्त छन् । अहिले नाका खुलेको छ । झोप्पा, खच्चडमा बोकाएर स्याउ कुम्दाङ पुर्याइएको छ ।’ प्रतिकेजी रु. ३० देखि ५० मा स्याउ बिक्री गरिएको बताइएको छ । स्याउ बिक्री गरेको पैसाबाट नून, तेल, करुलगायत दैनिक आवश्यक पर्ने खाद्यान्न खरिद गरिएको छ । प्रतिगोटा स्याउ पनि बिक्री हुने गरेको गुरुङले बताउनुभयो । एउटा स्याउ बिक्री गर्नुपर्दा तिब्बती एक फेवामा बिक्री गरिन्छ जुन नेपालीमा १५ रुपैंया हो । 

उत्तरी गोरखामा मनास्लु संरक्षण क्षेत्र आयोजना र जिल्ला कृषि बिकास कार्यालयले बर्षेनी स्याउका बिरुवा अनुदानमा उपलब्ध गराउने गरेका छन् । स्याउका बिरुवा लगाएको करिब पाँच बर्षमा राम्रो उत्पादन दिन थाल्छ । स्याउ फलेका क्षेत्रमा सडक पहुँच नहुँदा उत्पादित स्याउले बजार पाएको छैन । खच्चडमा ढुवानी गरी सदरमुकाम गोरखा बजार ल्याइपुर्याउन कम्तिमा चार दिन लाग्छ । भीरको बाटो स्याउ ढुवानी गर्नुपर्दा ठोक्किएर स्याउका दानाहरु कुहिने गर्छ । उत्तरी गोरखाबासीले उत्पादित सबै स्याउ बिक्री नहुँदा घरेलु मदिरा बनाउने गरेका छन् । स्याउ उत्पादन भएपनि सडक नहुँदा बजारीकरणमा समस्या रहेको प्रोकका वडाध्यक्ष पेमाडुण्डुप लामाले जानकारी दिनुभयो । 

उहाँले भन्नुभयो, ‘सिर्दिवास, बिहीलगायत गाउँमा स्याउ टिपिएको छ । प्रोक, ल्होमा अझै एक साता स्याउ टिपिँदैन । सडक नहुँदा स्याउ बजारसम्म झार्न सकिएन । हेलिकोप्टरबाट स्याउ ढुवानी गर्दा महंगो पर्छ, खच्चडबाट ढुवानी गर्दा बाटोमै कुहिन्छ ।’ खाद्यान्न, कपडा खच्चडबाट ढुवानी गरिन्छ । खच्चडबाट ढुवानी गर्दा प्रतिकेजी ९० रुपैंया हाराहारी पर्छ । ढुवानी महंगो हुँदा प्रतिकेजी नूनको मूल्य १२० रुपैंया पर्न आउँछ । उत्तरी गोरखाबासीले सदरमुकामबाट भन्दा तिब्बती नाका पार गरी कुम्दाङ सहरबाट लत्ताकपडा र खाद्यान्न खरिद गरी ल्याउने गरेका छन् ।